Өөрт тохирох эрийг хүлээхээс залхсан эмэгтэй өөртэйгөө гэрлэжээ

Их Британийн Саффолк мужийн оршин суугч Сара Уилкинсон 20 жилийн турш мөрөөдлийн хуримандаа зориулж мөнгө хуримтлуулсны эцэст 2023 онд өөртэйгөө гэрлэх ёслол зохион байгуулжээ. Тэрбээр 40 нас хүрэх үедээ хүсч байсан алмаазан шигтгээтэй сүйн бөгжөө өөртөө бэлэглэснээр ийм шийдвэр гаргах санаа төрсөн байна. Улмаар 42 насандаа Феликстоу хотын Harvest House-д хуримаа хийж, гэр бүл, найз нөхдийнхөө 40 хүнийг урьжээ. Уилкинсон хуримын зардалд нийт 10,000 фунт стерлинг зарцуулсан бөгөөд өөртөө зориулан 14 амлалт бичсэн байна. Тэдгээрийн эхнийх нь телевизийн удирдлагаа хэзээ ч бусдад шилжүүлэхгүй байх тухай хошин амлалт байжээ. Түүний зохион байгуулсан ёслолыг “sologamy” буюу өөртэйгөө гэрлэх хэмээн нэрлэдэг. Ийм гэрлэлт нь хууль ёсны гэр бүлийн харилцаа үүсгэдэггүй, харин өөрийгөө хайрлах, хүлээн зөвшөөрөхийг илэрхийлдэг бэлгэдлийн үйлдэл юм.

Гэрлэлтийн талаарх ойлголт хэрхэн өөрчлөгдөж байна вэ? Өөртэйгөө гэрлэх ёслол зохион байгуулах тохиолдлууд зөвхөн Их Британиар хязгаарлагдахгүй байгаа юм. Тодруулбал, 2025 онд БНСУ-ын гоо сайхны бүтээгдэхүүний “Lush Korea” компанийн ажилтнуудын өөртэйгөө гэрлэх ёслолын тухай мэдээлэл олон нийтийн анхаарал татжээ. Тус компани гэрлээгүй ажилтнууддаа уламжлалт хуримын тэтгэмжтэй дүйцэх боломж олгох зорилгоор өөртэйгөө гэрлэсэн ажилтанд 500,000 воны урамшуулал, 10 хоногийн амралт олгодог байна. Энэхүү үзэгдэл нь гэрлэлтийн талаарх нийгмийн хандлага өөрчлөгдөж буй өргөн хүрээний нөхцөлтэй давхцаж буй. АНУ-ын Хүн амын тооллогын хорооны 2025 оны мэдээллээр тус улсын нийт өрхийн 29 хувийг ганц хүнтэй өрх эзэлж байгаа нь 1975 оны 20 хувиас өссөн үзүүлэлт юм. Мөн эмэгтэйчүүдийн анхны гэрлэлтийн медиан нас 1975 онд 21.1 байсан бол 2025 онд 28.4 болж нэмэгджээ. Түүнчлэн нийгмийн сүлжээнд ганц бие амьдралыг эерэгээр харуулах шинэ хандлагууд тодорч байна. Тухайлбал, 2026 онд “WIRED” сэтгүүл залуус хайр дурлалын харилцаанаас илүү хувийн хөгжил, бие даасан байдалдаа анхаарахыг илэрхийлдэг “solomaxxing” хандлагын талаар мэдээлжээ.

Өөртэйгөө гэрлэхийн цаад шалтгаан юу вэ? Тель-Авивын их сургуулийн судлаач Киннерет Лахад, Михал Кравель-Тови нарын 2020 онд нийтлүүлсэн эрдэм шинжилгээний өгүүлэлд өөртэйгөө гэрлэх ёслолыг зөвхөн өөрийгөө хайрлах үйлдэл бус, гэрлэх, хүүхэдтэй болох зэрэг нийгмийн тогтсон цаг хугацааны хүлээлтээс хувь хүн өөрийгөө чөлөөлөх бэлгэдэл гэж тайлбарласан байна. Түүнчлэн сэтгэл засалч Жон Амодео CNN-д өгсөн тайлбартаа хүмүүс аз жаргалтай, утга учиртай амьдрахын тулд заавал хосын харилцаанд байх шаардлагагүйг улам бүр ойлгож байгааг онцолжээ. Гэхдээ өөртэйгөө гэрлэх нь хайр дурлалын харилцаанаас бүрмөсөн татгалзаж буй хэрэг биш. Сара Уилкинсон ч ирээдүйд тохирох хүнтэйгээ учрах боломжийг үгүйсгээгүй бөгөөд 2024 онд BBC-д өгсөн ярилцлагадаа хэн нэгэнтэй учирвал сайхан, учрахгүй байсан ч амьдралдаа сэтгэл хангалуун байж чадна гэдгээ илэрхийлсэн байна. Ийнхүү өөртэйгөө гэрлэх ёслол нь одоогоор ховор, бэлгэдлийн шинжтэй үзэгдэл хэвээр байгаа ч гэрлэлт, ганц бие амьдрал, хувь хүний аз жаргалын талаарх уламжлалт ойлголт хэрхэн өөрчлөгдөж буйг харуулах нэгэн сонирхолтой жишээ болжээ.