Цас цагаан харагдавч цэвэр гэсэн үг биш

Сургуулийн орчимд хүүхдүүд модны мөчирт тогтсон цас идэж байгаатай холбогдуулан Нийслэлийн эрүүл мэндийн газраас (НЭМГ) сэрэмжлүүлэг гаргажээ. Цас хэдийгээр гаднаасаа цэвэр, цагаан харагддаг ч агаарт агуулагдах тоосонцор, тортог болон бусад бохирдуулагч бодистой холилдсон байх эрсдэлтэй. Иймээс цасны өнгө, харагдах байдлаар нь идэхэд аюулгүй эсэхийг тодорхойлох боломжгүй юм. Модны мөчирт тогтсон цас ч бас бохирдолтой байж болзошгүй. Цас нь агаар мандал дахь усны уураас мөсөн талст үүсгэн бүтэж, тэдгээр нь томрон газарт унаснаар бий болдог байгалийн үзэгдэл юм. Гэвч цас үүсэх, агаараар дамжин унах болон гадаргуу дээр тогтох явцдаа орчныг бохирдуулагч бодисуудтай холилдох магадлалтай. Ялангуяа автомашины хөдөлгөөн ихтэй зам, сургууль, орон сууцны орчимд тогтсон цас тээврийн хэрэгслийн утаа, замын тоос болон бусад эх үүсвэрээс ялгарсан бохирдуулагчаар дамжуулан бохирдож болзошгүй.

Хүүхдүүдэд цас идэх эрсдэлийг тайлбарлахыг зөвлөв Хүүхдүүд цасны өнгө, хэлбэрийг сонирхон амандаа хийх тохиолдол гардаг тул эцэг эх, асран хамгаалагчид болон багш нар тэдэнд цас идэхгүй байхыг ойлгуулах шаардлагатай. Цасанд агуулагдаж болзошгүй бохирдуулагчийн төрөл, хэмжээ нь тухайн орчны агаарын чанар, замын хөдөлгөөн, цас тогтсон хугацаа зэрэг хүчин зүйлээс хамааран ялгаатай байдаг. Иймээс хүүхэд цас идсэн тохиолдол бүрд эрүүл мэндэд сөрөг нөлөө заавал илэрнэ гэж дүгнэх боломжгүй ч цасыг хүнсний зориулалтаар хэрэглэхээс зайлсхийхийг анхаарууллаа.