Нөмрөгийн түймрийн хохирлыг тогтоох лабораторийн шинжилгээ эхэллээ

Нөмрөгийн дархан цаазат газар гарсан түймрийн улмаас 24 мянга орчим га талбай ойн экосистем өртсөнийг урьдчилсан судалгаагаар тогтоожээ. Харин түймрийн улмаас байгаль орчинд учирсан хохирлын хэмжээ, шаталтын зэрэглэл болон экосистемд үзүүлсэн нөлөөллийг нарийвчлан тогтоох ажил үргэлжилж байна.

Түймрийн хохирлыг үнэлэх судалгааг бэлтгэл ажил, хээрийн судалгаа, суурин боловсруулалт, нэгдсэн дүгнэлт гаргах гэсэн дөрвөн үе шаттайгаар зохион байгуулж байгаа аж.

Аравдугаар сарын 31-ний байдлаар эхний хоёр үе шат дуусч, зайнаас тандан судлах мэдээлэлд боловсруулалт хийх, хээрийн хэмжилт болон дээж цуглуулах ажлыг гүйцэтгээд байна.

Хөрс, ургамлын дээжид лабораторийн шинжилгээ хийж байна

Одоогоор судалгааны гуравдугаар үе шат буюу хээрийн судалгаагаар цуглуулсан мэдээлэл, дээж, хэмжилтийн үр дүнг боловсруулах ажил үргэлжилж байна.

Тухайлбал, түймрийн улмаас ургамлын үндэс, хөрсний органик бүрэлдэхүүн хэсгүүд шатсан эсэх, хөрсний шинж чанарт ямар өөрчлөлт гарсан болон экосистемд үзүүлсэн нөлөөллийг лабораторийн шинжилгээгээр тодорхойлж байгаа аж.

Мөн тал хээрийн экосистемийн биомасс гадаргын гүймэг түймэрт өртсөнтэй холбогдуулан Нөмрөгөөс цуглуулсан дээжийг Ботаникийн цэцэрлэгт хүрээлэнгээс 2024, 2025 онд бүрдүүлсэн ургамлын дээжтэй харьцуулан судлахаар болжээ.

Эдгээр шинжилгээний үр дүнд үндэслэн түймэрт өртсөн талбайн шаталтын зэрэглэл, ойн насжилт болон байгаль орчинд учирсан хохирлын нэгдсэн үнэлгээг гаргах юм.

Алслагдсан бүсүүдэд нисдэг тэргээр хүрч, судалгаа хийжээ

Түймрийн хохирлыг тогтоох хээрийн судалгаанд эрдэмтэн, судлаач, шинжээч болон холбогдох байгууллагын албан хаагчдаас бүрдсэн 50 орчим хүн оролцсон байна.

Судалгааны багийнхан хүн хүрэхэд хэцүү, алслагдсан байршлуудад нисдэг тэргээр хүрч, хөрс, ургамлын дээж цуглуулах, нарийвчилсан хэмжилт хийх ажлыг гүйцэтгэжээ.

Ингэснээр хээрийн судалгааг төлөвлөсөн хугацаанаас өмнө дуусгах боломж бүрдсэнийг ажлын хэсэг онцолсон байна.