Нийслэлд томуугийн өвчлөл нэмэгдэж, түргэн тусламжийн дуудлага 56.7 хувиар өсчээ

Нийслэлийн хэмжээнд томуу, томуу төст өвчний тархалт нэмэгдэж, эрүүл мэндийн байгууллагуудын тусламж, үйлчилгээний ачаалал өсч байгааг Нийслэлийн эрүүл мэндийн газраас мэдээллээ.

Арваннэгдүгээр сарын 2-ны байдлаар нийслэлийн Түргэн тусламжийн төвд 2,249 дуудлага бүртгэгдсэн нь өмнөх оны мөн үеэс 56.72 хувиар өссөн үзүүлэлт болжээ.

Мөн нийслэлийн харьяа эрүүл мэндийн байгууллагуудад 877 хүүхэд хэвтэн эмчлүүлж байгаа нь өнгөрсөн оны мөн үеийн 764 хүүхэдтэй харьцуулахад 113-аар буюу 14.79 хувиар нэмэгдсэн байна.

Сүүлийн 3 жилийн томуугийн дэгдэлтийн оргил үе-Арваннэгдүгээр сарын 19-24

Нийслэлийн эрүүл мэндийн газрын мэдээлснээр сүүлийн гурван жилийн дунджаар томуу, томуу төст өвчний дэгдэлтийн оргил үе арваннэгдүгээр сарын 19-24-ний хооронд таарч байжээ.

Иймээс ойрын долоо хоногуудад эрүүл мэндийн байгууллагуудын ачаалал цаашид нэмэгдэх эрсдэлтэй байна. Өвчлөл нэмэгдэж байгаатай холбогдуулан эрсдэлт бүлгийн иргэдэд үзүүлэх тусламж, үйлчилгээний хүртээмжийг нэмэгдүүлэхээр төлөвлөжээ.

Тухайлбал, эрсдэлт бүлгийн иргэдийг гэрээр эргэх, эрүүл мэндийн зөвлөгөө, мэдээлэл өгөх, хяналтыг эрчимжүүлэх, өдрийн эмчилгээг Өрхийн эрүүл мэндийн төвүүдэд түшиглэн зохион байгуулах арга хэмжээ авахаар болсон байна.

Өрхийн эмнэлгүүд арваннэгдүгээр сарын 7-ноос уртасгасан цагаар ажиллана

Томуу, томуу төст өвчний улмаас эмнэлэгт хандах иргэдийн тоо нэмэгдэж байгаатай холбогдуулан Өрхийн эрүүл мэндийн төвүүдийн ажиллах цагийг уртасгахаар төлөвлөсөн байна.

Тодруулбал, арваннэгдүгээр сарын 7-ны бямба гарагаас эхлэн дараах цагийн хуваариар ажиллах бэлэн байдлыг хангахаар болжээ.

Ажлын өдрүүдэд: 20:00 цаг хүртэл

Амралтын өдрүүдэд: 16:00 цаг хүртэл

Нийтээр тэмдэглэх баярын өдрүүдэд: 16:00 цаг хүртэл

Томуугийн халдвараас хэрхэн сэргийлэх вэ?

Томуу, томуу төст өвчний халдвараас урьдчилан сэргийлэхийн тулд олон нийтийн газраар зорчихдоо амны хаалт зүүх, гараа тогтмол угаах, дулаан хувцаслах, гэр болон ажлын өрөө тасалгаанд агаар сэлгэлт хийхийг зөвлөжээ.

Мөн халуурах, ханиалгах, хоолой өвдөх зэрэг шинж тэмдэг илэрсэн тохиолдолд бусдад халдвар тараахаас сэргийлж, шаардлагатай үед эмнэлэгт хандахыг анхааруулав.

Бага насны хүүхэд, ахмад настан болон архаг суурь өвчтэй иргэд томуугийн хүндрэлд өртөх эрсдэл өндөр байдаг тул өвчний шинж тэмдгийг анхааралтай ажиглах шаардлагатай.

Амьсгал давчдах, цээж хонхолзох, уруул хөхрөх, ухаан санааны байдал өөрчлөгдөх зэрэг шинж тэмдэг илэрвэл яаралтай эмнэлгийн тусламж авахыг зөвлөжээ.