АНУ-ын үйлдвэрлэлийн идэвхжил сүүлийн таван жилийн дээд түвшинд ойртсон ч үнийн өсөлт бизнесүүдийг түгшээж байна

АНУ-ын үйлдвэрлэлийн салбарын идэвхжил аравдугаар сард хүлээлтээс давсан өсөлт үзүүлсэн ч түүхий эдийн өндөр үнэ, нийлүүлэлтийн тасалдал болон худалдааны бодлогын тодорхойгүй байдал үйлдвэрлэгчдийн итгэлийг сулруулсаар байна. АНУ-ын Нийлүүлэлтийн удирдлагын хүрээлэнгийн мэдээлснээр, тус улсын үйлдвэрлэлийн худалдан авалтын менежерийн индекс аравдугаар сард 55.5 нэгж болж, өмнөх сараас 1.0 нэгжээр нэмэгджээ. “Reuters”-ийн санал асуулгад оролцсон эдийн засагчид уг үзүүлэлтийг 54.5 түвшинд өөрчлөлтгүй хэвээр хадгалагдана хэмээн таамаглаж байсан юм. PMI буюу худалдан авалтын менежерийн индекс 50 нэгжээс дээш байх нь үйлдвэрлэлийн салбарын идэвхжил өсөлттэй байгааг илэрхийлдэг бол уг босгоос буурах нь агшиж буйг илтгэнэ. АНУ-ын эдийн засгийн 9.4 орчим хувийг бүрдүүлдэг үйлдвэрлэлийн салбарын PMI энэ оны турш өсөлтийн бүсэд хадгалагдаж буй. Үйлдвэрлэлийн гарцын индекс аравдугаар сард 2.3 нэгжээр нэмэгдэж, 59 нэгж болсон нь 2021 оны арваннэгдүгээр сараас хойших дээд үзүүлэлт юм. Тээврийн хэрэгсэл, цахилгаан тоног төхөөрөмж, машин механизм, үндсэн металл болон компьютер, электрон бүтээгдэхүүн зэрэг 12 салбарт үйлдвэрлэлийн идэвхжил өссөн бол гурван салбарт буурчээ.

Дотоодын эрэлт болон хиймэл оюуны хөрөнгө оруулалт өсөлтийг дэмжив Үйлдвэрлэлийн идэвхжил нэмэгдэхэд өрхийн хэрэглээ болон хиймэл оюунтай холбоотой бизнесийн хөрөнгө оруулалт голлон нөлөөлжээ. Ялангуяа АНУ-ын дотоодын эрэлт гуравдугаар улиралд сүүлийн тав гаруй жилийн хамгийн өндөр хурдаар өссөн байна. Түүнчлэн тус улсын эдийн засаг гуравдугаар улиралд жилийн дүнгээр 3.4 хувийн өсөлт үзүүлсэн нь хоёрдугаар улирлын 2.2 хувиас эрчимжсэн үзүүлэлт болж буй. Тайлант хугацаанд үйлдвэрлэлийн шинэ захиалгын индекс есдүгээр сарын 55.3-аас аравдугаар сард 55.5 болж өссөн бөгөөд экспортын захиалга ч нэмэгджээ. Гэхдээ хиймэл оюуны хөрөнгө оруулалтын эрчим цаашид саарч болзошгүйг эдийн засагчид анхааруулж байна. Тухайлбал, “Citigroup”-ийн эдийн засагч Вероника Кларкийн тайлбарласнаар, хиймэл оюуны салбарт хөрөнгө оруулалт өндөр хэвээр байсан ч санхүүжилтийн нөхцөл чангарч, зээлийн хүү өссөнөөр бусад үйлдвэрлэлийн салбарын хөрөнгө оруулалт хязгаарлагдах эрсдэлтэй байгаа юм.

Үйлдвэрлэгчдийн 66 хувь нь бус, сэтгэгдлийн 66 хувь нь сөрөг байв Хэдийгээр үйлдвэрлэлийн бодит үзүүлэлтүүд сайжирсан ч үйлдвэрлэгчдийн бизнесийн орчны талаарх үнэлгээ гурав дахь сардаа дараалан мууджээ. АНУ-ын Нийлүүлэлтийн удирдлагын хүрээлэнгийн Үйлдвэрлэлийн бизнесийн судалгааны хорооны дарга Сьюзан Спенсийн мэдээлснээр, судалгаанд ирүүлсэн сэтгэгдлийн 66 хувь нь бизнесийн орчны талаар таагүй сэтгэгдэлтэй байгаагаа илэрхийлсэн байв. Үнийн тогтворгүй байдал, нийлүүлэлтийн хугацаа уртассан явдал, импортын тариф болон дайнтай холбоотой эрсдэлүүд голлох шалтгаан болжээ. Тухайлбал, металл бүтээгдэхүүн үйлдвэрлэгчдийн зарим нь зах зээлийн тодорхойгүй байдал өндөр буйгаас хэрэглэгчид урт хугацааны гэрээ байгуулах хүсэлгүй болсныг мэдээлсэн байна. Тээврийн тоног төхөөрөмж үйлдвэрлэгчид ч тоног төхөөрөмжийн үнэ өндөр байгаагаас худалдан авагчид шийдвэрээ хойшлуулж байгааг онцолжээ.

Түүхий эдийн үнэ өндөр байгаа нь инфляцыг бууруулахад хүндрэл учруулж байна Үүний зэрэгцээ Үйлдвэрлэгчдийн худалдан авдаг түүхий эд, материалын үнийн индекс аравдугаар сард 75.2 болж, өмнөх сараас 2.7 нэгжээр буурсан ч үнэ өссөөр байгаа юм. Ялангуяа хөнгөн цагаан, зэс, дизель түлш, электрон эд анги болон санах ойн чипийн үнэ өссөн байна. Ялангуяа хиймэл оюуны дата төвүүдийн бүтээн байгуулалт эдгээр бүтээгдэхүүний эрэлтийг нэмэгдүүлж, нийлүүлэлтэд нэмэлт ачаалал үүсгэжээ.