АНУ-ын тэтгэврийн сан 2032 онд шавхагдвал тэтгэмж 22–26 хувиар буурах эрсдэлтэй

АНУ-ын Нийгмийн даатгалын өндөр насны болон тэжээгчээ алдсаны тэтгэврийн сангийн нөөц хөрөнгө 2032 он гэхэд шавхагдаж, Конгресс санхүүжилтийн зохицуулалт хийхгүй бол тэтгэвэр авагчдын тэтгэмж 22–оос 26 хувиар буурах эрсдэлтэй байгааг анхаарууллаа.

Нийгмийн даатгалын сангийн итгэмжлэгдсэн төлөөлөгчдийн зургаадугаар сарын тайланд тус сангийн нөөц 2032 оны дөрөвдүгээр улиралд дуусч, тухайн үеэс төлөх ёстой тэтгэмжийн хэмжээ 22 хувиар буурч болзошгүй гэж тооцжээ.

Гэвч энэ нь Нийгмийн даатгалын тэтгэврийн тогтолцоо бүрэн зогсоно гэсэн үг биш. Харин нөөц хөрөнгө дууссан ч хөдөлмөр эрхлэгчдийн цалингаас төвлөрөх татварын орлого үргэлжлэх бөгөөд харин одоогийн хуулиар амласан тэтгэмжийг бүрэн санхүүжүүлэхэд хүрэлцэхгүй болох эрсдэлтэй аж.

Тэтгэвэр авагчдын сарын орлого 500 ам.доллароор буурч болзошгүй

Холбооны төсвийн хорооноос гаргасан тооцоогоор тэтгэмж 24 хувиар буурах нь улсын хэмжээнд сарын дундаж тэтгэврийн орлогыг ойролцоогоор 500 ам.доллароор багасгах эрсдэлтэй гэсэн үг.

Тэтгэврийн санхүүжилтийн хүндрэл нь зөвхөн ахмад настнуудын орлогоор хязгаарлагдахгүй. Тэтгэврийн орлого буурах нь өрхийн хэрэглээг хумиж, жижиглэн худалдаа, үйлчилгээний салбарын эрэлтэд нөлөөлнө.

Тэтгэврийн аюулгүй байдлын үндэсний хүрээлэнгийн 2025 оны судалгаанд дурдсанаар Нийгмийн даатгалын тэтгэмж 2023 онд АНУ-ын эдийн засагт 2.6 их наяд ам.долларын үйлдвэрлэл, үйлчилгээний гарцыг дэмжиж, 12 сая гаруй ажлын байртай холбоотой эдийн засгийн идэвхийг бий болгожээ.

Конгресст ямар сонголтууд байна вэ?

Тэтгэврийн болон хөдөлмөрийн чадвар алдсаны даатгалын санг нэгтгэх хувилбараар нөөц хөрөнгийн шавхагдах хугацааг 2034 оны гуравдугаар улирал хүртэл сунгаж, тэтгэмжийн боломжит бууралтыг 17 хувь болгон багасгаж болохоор тооцжээ.

Гэхдээ ийм өөрчлөлт хийхэд Конгрессын хууль тогтоох шийдвэр шаардлагатай. Одоогийн тогтолцоогоор ажилтан болон ажил олгогч тус бүр цалингийн 6.2 хувийг Нийгмийн даатгалын татварт төлдөг. Санхүүжилтийн зөрүүг бууруулахын тулд татварын орлогыг нэмэгдүүлэх, тэтгэмжийн томьёог өөрчлөх болон сангуудын санхүүжилтийн бүтцийг шинэчлэх зэрэг хувилбарыг хэлэлцэх шаардлагатай.

Энэ бүхнээс харахад 2032 он Конгрессын хувьд шийдвэр гаргах чухал хугацаа юм. Учир нь шаардлагатай өөрчлөлтийг хийхгүй удах тусам одоогийн болон ирээдүйн тэтгэвэр авагчдад үзүүлэх нөлөө нэмэгдэх эрсдэлтэй.

Ийнхүү АНУ-ын тэтгэврийн сангийн нөөц шавхагдах хугацаа ойртож байгаа нь Конгресст санхүүжилтийн урт хугацааны шийдэл олох шаардлагыг нэмэгдүүлж байна.