Ирэх долоо хоногт ихэнх нутгаар хүйтэрч, 2-ноос 5-ны хооронд олон аймагт цасан шуурга шуурна

Ус цаг уур, орчны шинжилгээний газрын мэдээлснээр ирэх долоо хоногт ихэнх нутгаар хүйтэн салхитай байж, хүйтэрч, сэрүүснэ. Арваннэгдүгээр сарын эхний өглөө нийслэл болон зарим нутагт цас орж хонов.

Цас, цасан шуурга

• 2-нд Төв аймгийн зүүн хойд, Завхан, Хөвсгөл, Сэлэнгэ, Хэнтий, Дорнодын хойд сумдаар.
• 3-нд Баян-Өлгий, Увс, Ховд, Завхан, Сэлэнгийн зарим, Хөвсгөл, Архангайн баруун, Говь-Алтайн хойд сумдаар.
• 4-нд Баян-Өлгий, Увс, Ховд, Завхан, Хөвсгөл, Архангай, Сэлэнгийн зарим, Говь-Алтай, Булган, Төв, Хэнтийн хойд сумдаар.
• 5-нд Сэлэнгэ, Төв, Хэнтий, Сүхбаатарын зарим, Булганы зүүн, Дорноговийн хойд, Дорнодын өмнөд сумдаар.

Эдгээр нутгаар 0.0–5.0 мм цас орж, цасан шуурга шуурна.

Салхи

Салхи 2-нд нутгийн зарим газраар, 3, 4-нд Алтайн уулархаг нутаг, говь, тал хээрийн нутгаар, 5-нд говь, тал хээрийн нутгаар секундэд 15–17 метр хүрч ширүүснэ.

Агаарын хэм

Шөнөдөө Завхан, Заг, Байдраг голын эхээр -16...-21 хэм, Алтай, Хангай, Хөвсгөл, Хэнтийн уулархаг нутаг, Идэр, Хараа, Ерөө, Туул, Тэрэлж, Улз, Халх голын хөндийгөөр -11...-16 хэм, говийн баруун өмнөд хэсгээр +1...-4 хэм, бусад нутгаар -5...-10 хэм хүйтэн байна.

Өдөртөө Дархадын хотгор, Завхан, Заг, Байдраг голын эхээр -3...-8 хэм хүйтэн, уулархаг нутаг болон томоохон голын хөндийгөөр -3...+2 хэм, говийн өмнөд хэсгээр +8...+13 хэм, бусад нутгаар +2...+7 хэм дулаан байна. Лхагва гараг буюу 4-нд нутгийн баруун хойд хэсгээр, 5-нд ихэнх нутгаар сэрүүснэ.

Цасан шуурганы үеэр алс замд гарахаас өмнө цаг агаарын мэдээг анхааралтай хянах нь зүйтэй.

Эх сурвалж: Ус цаг уур, орчны шинжилгээний газар, iSee.mn