Ирэх долоо хоногт уулархаг нутгаар цас орж, төв болон зүүн аймгуудын хойд хэсгээр хүйтэрнэ

Ус, цаг уур, орчны шинжилгээний газрын мэдээлснээр ирэх долоо хоногт уулархаг нутгаар цас орж, говь, тал, хээрийн нутгаар салхи ширүүсэх бөгөөд 10 дугаар сарын 29-нд төв болон зүүн аймгуудын хойд хэсгээр хүйтэрнэ.

Өнөөдөр

Өнөөдөр буюу 10 дугаар сарын 25-нд Говь-Алтай, Завхан, Хөвсгөл, Өмнөговийн зарим сумын нутгаар 0.0-1.0 мм ялимгүй цас орж, говь, талын нутгаар салхи шуургатай байна. Бусад нутгаар цас орохгүй бөгөөд ихэнх нутгаар үүл солигдоно. Улаанбаатарт цас орохгүй, 0 хэм орчим байна.

Ирэх өдрүүдэд

10 дугаар сарын 25-28-нд Хангай, Хөвсгөл, Хэнтийн уулархаг нутгаар цас орж, говь, тал, хээрийн нутгаар салхитай байна. Тодруулбал, 26-нд Завхан, Хөвсгөл, Сэлэнгийн зарим, Төв аймгийн зүүн хойд сумдаар, 28-нд Увс, Завхан, Хөвсгөлийн зарим сумдаар 0.0-1.0 мм, 29-нд Завхан, Хөвсгөл, Архангай, Булган, Сэлэнгэ, Төв аймгийн зарим, Хэнтий, Дорнодын хойд сумдаар 0.0-2.0 мм цас орно.

Салхи 26-27-нд говь, тал, хээрийн нутгаар секундэд 14-16 метр, 28-нд Алтайн уулархаг нутгаар, 29-нд говь, тал, хээрийн нутгаар түр зуур секундэд 18-20 метр хүрч ширүүсэж, шороон шуурга шуурна.

Агаарын температур

• Дархадын хотгор, Завхан, Заг, Байдраг голын эхээр шөнөдөө 23-28 хэм хүйтэн, өдөртөө 7-12 хэм хүйтэн.
• Алтай, Хангай, Хөвсгөл, Хэнтийн уулархаг нутаг, Идэр, Тэс, Туул, Тэрэлж голын хөндийгөөр шөнөдөө 16-21 хэм хүйтэн, өдөртөө 1-6 хэм хүйтэн.
• Говийн бүсийн өмнөд хэсгээр шөнөдөө 2-7 хэм хүйтэн, өдөртөө 6-11 хэм дулаан.
• Говийн бүсийн хойд хэсэг, Дорнод-Дарьгангын тал нутаг, Улз, Халх голын хөндийгөөр шөнөдөө 7-12 хэм хүйтэн, өдөртөө 1-6 хэм дулаан.
• Бусад нутгаар шөнөдөө 11-16 хэм хүйтэн, өдөртөө 2 хэм хүйтнээс 3 хэм дулаан.

Ирэх долоо хоногийн пүрэв гаригт буюу 10 дугаар сарын 29-нд төв болон зүүн аймгуудын нутгийн хойд хэсгээр хүйтэрнэ. Мэдээллийг iSee.mn, GoGo.mn сайтууд X сүлжээнд түгээсэн юм.