Д.Трампыг гадаадын криптовалютын хэлцлээс хууль бусаар ашиг хүртсэн үндэслэлээр шүүхэд өгчээ

АНУ-ын Ерөнхийлөгч Дональд Трамп болон түүний гэр бүлтэй холбоотой криптовалютын “World Liberty Financial” компанийг гадаадын хөрөнгө оруулалтаас хууль бусаар ашиг хүртсэн гэх үндэслэлээр шүүхэд өгчээ.

“Circle Internet” группийн хувьцаа эзэмшигч Ж. Бенжамин Гринберг өчигдөр Вашингтон хот дахь АНУ-ын Холбооны шүүхэд нэхэмжлэл гаргасан байна. Тэрбээр Ерөнхийлөгч Д.Трамп, “World Liberty Financial”, тус компанитай холбоотой хуулийн этгээдүүд болон АНУ-ын Ойрх Дорнодын асуудал хариуцсан тусгай элч Стив Виткоффыг хариуцагчаар нэрлэжээ.

Гринбергийн үзэж байгаагаар Д.Трампын гэр бүлийн криптовалютын бизнест Арабын нэгдсэн Эмират улстай холбоотой хөрөнгө оруулалтыг хийж, Ерөнхийлөгч санхүүгийн ашиг хүртсэн нь АНУ-ын Үндсэн хуулийн гадаадын төрөөс ашиг хүртэхийг хязгаарласан заалтыг зөрчсөн байж болзошгүй гэж үзэж байна.

500 сая болон хоёр тэрбум ам.долларын хэлцэл маргааны төвд оржээ Нэхэмжлэлд АНЭУ-ын Үндэсний аюулгүй байдлын зөвлөх Шейх Тахнун бин Заид Аль Нахаянтай холбоотой хоёр хэлцлийг онцолсон байна.

Эхнийх нь 2025 оны нэгдүгээр сард Дональд Трамп Ерөнхийлөгчийн тангараг өргөхөөс хэдхэн хоногийн өмнө хийсэн хэлцэл юм. Шейх Тахнуны дэмжлэгтэй хөрөнгө оруулагчид “World Liberty Financial” компанийн 49 хувийн эзэмшлийг 500 сая ам.доллароор худалдан авахаар тохиролцжээ.

Харин хоёр дахь хэлцэл нь Абу Дабид төвтэй “MGX” хөрөнгө оруулалтын компани 2025 онд криптовалютын “Binance” биржид хоёр тэрбум ам.долларын хөрөнгө оруулалт хийхдээ “World Liberty Financial”-ийн гаргасан “USD1” тогтвортой зоосыг ашигласантай холбоотой.

Нэхэмжлэгчийн үзэж байгаагаар эдгээр хэлцэл нь Трампын гэр бүлийн криптовалютын бизнесийн орлого, ашиг сонирхолд нөлөөлсөн бөгөөд Ерөнхийлөгч өөрөө санхүүгийн ашиг хүртсэн байж болзошгүй гэж үзсэн байна.

Нэхэмжлэгч нь өрсөлдөгч крипто компанийн 10 мянган хувьцаа эзэмшдэг Ж. Бенжамин Гринберг нь ам.долларын ханштай уялдсан “USDC” тогтвортой зоос гаргадаг “Circle Internet Group” компанийн 10 мянган хувьцаа эзэмшдэг бөгөөд өмнө нь тус компанид ажиллаж байжээ. Тэрбээр “Circle”-ийн хувьцаа эзэмшигчийн хувиар компанийн нэрийн өмнөөс нэхэмжлэл гаргасан байна. Гринбергийн тайлбарласнаар “World Liberty Financial”-ийн гадаадын хөрөнгө оруулалттай холбоотой хэлцлүүд нь тус компанийн “USD1” тогтвортой зоосонд давуу байдал бий болгож, өрсөлдөгч “Circle”-ийн зах зээлд өрсөлдөх боломжийг хязгаарласан аж. Нэхэмжлэлд Трампын криптовалютын бизнесээс хүртсэн гэх орлогыг хууль бус гэж тогтоолгох, гадаадын эх үүсвэртэй бусад төлбөр, орлогыг ил болгох, хууль бус гэж тогтоогдсон ашгийг буцаан төлүүлэх шаардлага тавьжээ. Мөн хохирлын нөхөн төлбөр шаардаж байгаа ч хэмжээг нь тодорхой заагаагүй байна.

Цагаан ордон болон “World Liberty Financial” буруутгалыг няцаав Цагаан ордны хэвлэлийн төлөөлөгч Анна Келли нэхэмжлэлийг үндэслэлгүй гэж мэдэгдээд Дональд Трампын криптовалютын хөрөнгө оруулалттай холбоотой ашиг сонирхлын зөрчил байхгүй гэсэн байр суурь илэрхийлжээ. Харин “World Liberty Financial”-ийн хэвлэлийн төлөөлөгч Дэвид Ваксман тус компани АНУ-ын хууль тогтоомж, зохицуулалтыг мөрдөж ажилладаг бөгөөд АНУ-ын төрийн албан хаагч ажилладаггүй гэж мэдэгдсэн байна. Тэрбээр нэхэмжлэлд дурдсан буруутгалуудыг үндэслэлгүй хэмээн үзэж, шүүхийн журмаар шийдвэрлүүлэхээ илэрхийлжээ. Мөн “Circle Internet" групп уг нэхэмжлэлийг санаачлаагүй, чиглүүлээгүй, зөвшөөрөөгүй, гаргахад оролцоогүй гэдгээ мэдэгдсэн байна.

АНУ-ын Үндсэн хуулийн гадаадын ашиг сонирхлыг хориглосон заалтыг зөрчсөн үү? Нэхэмжлэлийн эрх зүйн гол үндэслэл нь АНУ-ын Үндсэн хуулийн I зүйлийн 9 дэх хэсэгт "Foreign Emoluments Clause" буюу гадаад орны төрөөс бэлэг, хишиг, ашиг хүртэхийг хязгаарласан заалт байдаг.

Уг заалтаар АНУ-ын Холбооны тодорхой албан тушаал хашиж буй этгээд Конгрессын зөвшөөрөлгүйгээр гадаадын хаан, төр, засгаас бэлэг, цол хэргэм болон бусад ашиг хүртэхийг хориглодог.

Гринберг Трампын гэр бүлийн криптовалютын бизнестэй холбоотой дээрх хэлцлүүдийг уг заалтын хүрээнд авч үзэх ёстой гэж маргаж байна.

Харин шүүхийн хувьд нэхэмжлэгчийн шаардлага гаргах эрх, гадаадын хөрөнгө оруулалт нь Үндсэн хуулийн хориглосон ашигт хамаарах эсэх, Ерөнхийлөгч өөрөө тухайн хэлцлүүдээс ашиг хүртсэн эсэх зэрэг асуудлыг шийдвэрлэх шаардлагатай.

“World Liberty Financial” нь 2024 онд Трамп болон Виткоффын гэр бүлийн гишүүдийн оролцоотой байгуулагдсан. Тус компани “USD1” нэртэй, ам.долларын ханштай уялдсан тогтвортой зоос гаргадаг бөгөөд уг зоосыг Абу Дабигийн хөрөнгө оруулалтын томоохон хэлцэлд ашигласан нь маргааны нэг гол үндэслэл болжээ. Одоогоор шүүхийн эцсийн шийдвэр гараагүй байна.