Монголд ажиллаж буй гадаад иргэдийн тоо 51.5 хувиар өсч, 36.1 мянгад хүрчээ

Монгол Улсад хөдөлмөрийн гэрээгээр ажиллаж, сайн дураараа хөдөлмөрлөж буй гадаад иргэдийн тоо гуравдугаар улиралд 36.1 мянгад хүрэв.

Энэ нь өмнөх оны мөн үеэс 51.5 хувь буюу 12.3 мянган хүнээр, өмнөх улирлаас 19.8 хувь буюу 6,000 орчим хүнээр нэмэгдсэн үзүүлэлт юм.

Гадаад ажиллах хүчний 10 хүн тутмын долоо нь БНХАУ-ын иргэд бол Энэтхэг, Бангладеш, Филиппин, Вьетнамын иргэд удаалж байна.

Гадаад ажилчдын 26 хувь нь барилга, 21.1 хувь нь уул уурхай, олборлолт, 17.4 хувь нь боловсруулах үйлдвэрт ажиллаж байна.

Өөрөөр хэлбэл, гадаад ажилчдын бараг гуравны хоёр нь эдгээр гурван салбарт төвлөрч байгаа нь гадаад ажиллах хүчний хэрэглээ үйлдвэрлэл, бүтээн байгуулалтын салбаруудад өндөр байгааг харуулав.Дийлэнх хэсгийг буюу 92.8 хувийг эрэгтэйчүүд эзэлж байгаа бол насны бүлгээр 35–аас 39 насныхан хамгийн өндөр хувь эзэлжээ.