Ажилтнууд өөрчлөлтөөс залхаж байна уу: “Өөрчлөлтийн ядаргаа” хөдөлмөрийн зах зээлд шинэ сорилт үүсгэлээ

Байгууллагууд хиймэл оюун, шинэ технологи нэвтрүүлэх, бүтцийн өөрчлөлт хийх, ажлын арга барилаа шинэчлэх зэргээр тасралтгүй өөрчлөгдөж байна. Гэвч шинэчлэл богино хугацаанд давтагдах нь ажилтнуудын сэтгэлзүй, ажлын бүтээмжид сөргөөр нөлөөлж болзошгүйг хөдөлмөрийн зах зээлийн мэргэжилтнүүд анхаарууллаа.

Энэ үзэгдлийг “өөрчлөлтийн ядаргаа” гэж нэрлэдэг. Өөрөөр хэлбэл, ажилтнууд байгууллагын дараалсан шинэчлэлд байнга дасан зохицох шаардлагаас үүдэн сэтгэлзүйн болон бие махбодын хувьд туйлддаг байна.

Цар тахлын дараах ажлын орчны тогтворгүй байдал, технологийн хурдацтай хөгжил, байгууллагын бүтцийн өөрчлөлт зэрэг нь ажилтнуудын дасан зохицох чадварыг одоо ч сорьж байгаа аж.

Ажилтнуудын 73 хувь нь томоохон өөрчлөлтийг мэдэрчээ “Gallup” байгууллагын 2024 оны арванхоёрдугаар сард нийтэлсэн, 22 мянга гаруй ажилтныг хамарсан судалгаанд оролцогчдын 73 хувь нь өмнөх нэг жилийн хугацаанд ажлын орчиндоо томоохон өөрчлөлт мэдэрсэн гэж хариулжээ.

Энэ нь байгууллагуудын шинэчлэл ажилтнуудын өдөр тутмын үйл ажиллагаанд өргөн хүрээнд нөлөөлж байгаа гэсэн үг юм. Ажлын байрны өөрчлөлтийг зохицуулах боломжтой хэдий ч шинэчлэл дараалан хэрэгжих үед ажилтнуудаас шаардагдах цаг хугацаа, анхаарал, эрч хүч хуримтлагдан нэмэгддэг байна.

Өөрчлөлтийн ядаргаа хэрхэн илэрдэг вэ? Өөрчлөлтийн ядаргаа нь ажилтнууд шинэ санаачилгыг эсэргүүцэх, байгууллагын үйл ажиллагаанд оролцох идэвх нь буурах, эсвэл өөрчлөлтийг зөвхөн үүрэг гэж хүлээн авч, идэвхгүй дагах хэлбэрээр илэрч болно. Удаан үргэлжилсэн тодорхойгүй байдал нь ажлын стресс нэмэгдэх, байгууллагадаа итгэх итгэл сулрах, ажлын гүйцэтгэл буурах эрсдэлтэй холбоотой гэж судлаачид тайлбарлажээ.

Өөрчлөлтийн удирдлагын мэргэжилтэн Лоррейн “Ло” Стомскийн үзэж байгаагаар байгууллагуудын өөрчлөлтийн хурд ажилтнуудын дасан зохицох боломжийг улам бүр сорьж байна.

Ялангуяа удирдлага шинэчлэлийн зорилго, хэрэгжүүлэх хугацаа, ажилтнуудаас юу шаардахыг тодорхой тайлбарлаагүй тохиолдолд өөрчлөлтийг нэмэлт дарамт гэж хүлээн авах эрсдэлтэй.

Ажилтнуудыг шийдвэр гаргах үйл явцад оролцуулах нь чухал Пенсильванийн их сургуулийн Уортоны бизнесийн сургуулийн профессор Питер Капеллигийн тайлбарласнаар байгууллагын өөрчлөлтийг оновчтой удирдахгүй бол ажилтнуудад ихээхэн стресс үүсдэг. Учир нь шинэ систем, бүтэц, ажлын арга барилд шилжих бүрд ажилтнууд шинэ ур чадвар эзэмших, дадал зуршлаа өөрчлөх, тодорхойгүй нөхцөлд дасан зохицох шаардлагатай болдог.

Тиймээс байгууллагын удирдлага шинэчлэлийн шалтгаан, хүлээгдэж буй үр дүнг ойлгомжтой тайлбарлаж, ажилтнуудын санал хүсэлтийг сонсох шаардлагатайг тэрбээр онцолжээ.

Мөн ажилтнуудыг өөрчлөлтийн төлөвлөлт, хэрэгжилтэд оролцуулахын зэрэгцээ шинэ арга барилд шилжихэд шаардлагатай сургалт, мэдээлэл хэрэгслээр хангах нь чухал гэдгийг ч онцолжээ.

Хиймэл оюун болон автоматжуулалтын хэрэглээ өргөжиж буй өнөөгийн нөхцөлд байгууллагуудын хувьд зөвхөн шинэ технологи нэвтрүүлэх бус, ажилтнуудын дасан зохицох боломж, ажлын ачааллыг харгалзан өөрчлөлтийг удирдах шаардлага нэмэгдэж байна.