Гэр хорооллын айл өрхүүдийн цахилгааны шөнийн тарифын хөнгөлөлт ирэх сараас хэрэгжиж эхэлнэ

Нийслэлийн гэр хорооллын бүсийн айл өрхүүдийн агаарын охирдлыг бууруулах, ахуйн болон сууц халаалтын цахилгааны зардлыг хөнгөлөх зорилгоор жил бүр мөрддөг шөнийн тарифын хөнгөлөлт 11 дүгээр сарын 1-ний өдрөөс албан ёсоор эхлэх гэж байна. Энэхүү хөнгөлөлт нь 2017 оноос хойш хэрэгжиж байгаа бөгөөд "Улаанбаатар цахилгаан түгээх сүлжээ" (УБЦТС) ТӨХК-аас мэдээлснээр ирэх оны дөрөвдүгээр сарын 1-нийг хүртэл үргэлжилнэ.

Хөнгөлөлт оройн 21:00 цагаас өглөөний 09:00 цагийн хооронд ашигласан цахилгааны хэрэглээнд үйлчилнэ. Сүлжээний хүчдэлээс хамааран 220 В-ын холболттой айл өрх сард 1,500 кВт.ц, 380 В-ын холболттой айл өрх сард 3,000 кВт.ц хүртэлх шөнийн хэрэглээний төлбөрөөс 100 хувь чөлөөлөгдөх юм. Хэрэв тодорхойлсон хязгаараас давсан хэрэглээ гарвал илүү гарсан хэмжээнд 50 хувийн хөнгөлөлт тооцно.

Шөнийн тарифын хөнгөлөлтөд дараах үндсэн шаардлагыг хангасан өрхүүд хамрагдана. Үүнд:

-Цахилгааны төлбөрийн ямар нэг үлдэгдэлгүй, өргүй байх,

-Цагийн ялгаварт тоолууртай байх,

-Цахилгааныг зөвхөн ахуйн хэрэгцээнд болон байнга оршин суугаа гэр, сууцаа халаах зориулалтаар ашиглах.

Төлбөр тооцоолохдоо цагийн ялгаварт тоолуурын заалтад үндэслэн өдөр, орой, шөнийн хэрэглээний хувийг тодорхойлж, хэрэглээний хэмжээнээс (150 кВт.ц хүртэл, 151–300 кВт.ц, 300 кВт.цагаас дээш) хамаарсан шатлалт тарифаар үржүүлэн нийлбэр дүнг гаргадаг. Одоогоор нийслэлийн гэр хорооллын бүсэд 171,000 гаруй айл өрх оршин сууж байна.