Татвараас "мултрах" хүсэлтэй хятад иргэд Америкт хөрөнгөө байршуулж байна

Хятадын эрх баригчид иргэдийнхээ гадаадад байршуулсан хөрөнгөд тавих татварын хяналтаа өргөжүүлснээр чинээлэг хятадууд Сингапур, Хонконг дахь хөрөнгөө АНУ руу шилжүүлэх нь нэмэгджээ. Хувийн банкны үйлчилгээ үзүүлэгчид болон хуульчдын мэдээлснээр, долдугаар сард гадаад дахь хөрөнгийн орлогод өмнөх хугацааг хамруулан татвар ногдуулах арга хэмжээ авснаас хойш АНУ-д данс нээлгэх хүсэлт эрчимжсэн байна.

Сингапурт төвтэй “Golden Acacia Capital” компанийн гүйцэтгэх захирал Кит Таны мэдээлснээр, түүний үйлчлүүлэгчид долдугаар сараас эхлэн хөрөнгөө АНУ руу шилжүүлэхээр төлөвлөж эхэлсэн бөгөөд зарим нь хоёр сар хүрэхгүй хугацаанд дансаа нээлгэжээ. Их хэмжээний хөрөнгөтэй иргэд томоохон банкуудыг сонгож байгаа бол харьцангуй бага хөрөнгөтэй үйлчлүүлэгчид бүс нутгийн банкууд болон цахим брокерын үйлчилгээг ашиглаж байна.

Гадаад дахь хөрөнгийн орлогод 20 хувийн татвар ногдуулна

Хятадын татварын байгууллагууд долдугаар сард тус улсын татвар төлөгчдийн эзэмшдэг гадаад дахь итгэлцлийн сангийн орлого болон хөрөнгийн өсөлтөөс олсон ашигт 20 хувиар татвар ногдуулах зохицуулалтыг танилцуулжээ. Үүний улмаас Сингапур, Хонконгийн хуульчид үйлчлүүлэгчдийнхээ татварын өр төлбөрийг тооцоолох, итгэлцлийн санг татан буулгах, хувьцаа худалдах болон татварын төлбөрт зориулан зээл авах зэрэг асуудлаар ажиллаж байна.

АНУ нь улс орнууд гадаадын иргэдийн банкны дансны мэдээллийг харилцан солилцдог CRS тогтолцоонд нэгдээгүй. Тухайлбал, Хятадын иргэн Сингапур эсвэл Хонконгийн банкинд хөрөнгөө байршуулбал дансны мэдээлэл нь Хятадын татварын байгууллагад автоматаар хүрэх боломжтой. Харин АНУ-ын банкууд ийм мэдээллийг CRS-ийн дагуу Бээжинд дамжуулах үүрэг хүлээдэггүй тул зарим чинээлэг хятад иргэн хөрөнгөө тус улс руу шилжүүлэхийг илүүд үзэж байна.