Банк, ББСБ-ын харилцагчдын эрхийг нэгдсэн хуулиар хамгаалахаар төсөл хэлэлцүүлж байна
Хуулийн төсөлд банк, ББСБ, даатгал, үнэт цаас болон виртуал хөрөнгийн үйлчилгээ үзүүлэгчдийг хамруулахаар тусгажээ.
Санхүүгийн бүтээгдэхүүн, үйлчилгээний ил тод байдлыг нэмэгдүүлж, хэрэглэгч болон үйлчилгээ үзүүлэгчийн эрх, үүргийн тэнцвэрийг хангах зорилготой хуулийн төслийг олон нийтээр хэлэлцүүлж байна.
Монголбанк, Санхүүгийн зохицуулах хорооны хамтран боловсруулсан Санхүүгийн хэрэглэгчийн эрхийг хамгаалах тухай хуулийн төсөлд банк, банк бус санхүүгийн байгууллага, хадгаламж, зээлийн хоршоо, үнэт цаас, даатгалын компани болон виртуал хөрөнгийн үйлчилгээ үзүүлэгчдийг хамруулахаар тусгажээ.
Хамгаалалтад санхүүгийн үйлчилгээ авч буй иргэдээс гадна үйлчилгээ авахаар сонирхож байгаа хүмүүс, мөн хуульд заасан бичил үйлдвэр, үйлчилгээ эрхлэгчид хамрагдахаар байна.
Төсөл нь санхүүгийн бүтээгдэхүүн, үйлчилгээнд тавих нийтлэг шаардлагыг тогтоож, хэрэглэгчийн эрхийг хамгаалах чиглэлээр зохицуулагч байгууллагуудын хяналтыг боловсронгуй болгоход чиглэж байна.
УИХ-ын Эдийн засгийн байнгын хорооноос байгуулсан ажлын хэсэг аравдугаар сарын 27–28-нд нээлттэй хэлэлцүүлэг зохион байгуулж байгаа бөгөөд оролцогчдын саналыг нэгтгэн төслийг боловсронгуй болгох юм.
Холбоотой мэдээ
