“Bank of America”-ийн гүйцэтгэх захирал тураах эмийн хэрэглээг ирээдүйд үр өгөөжтэй “зөв хөрөнгө оруулалт” гэж тодорхойллоо

АНУ-ын томоохон ажил олгогчид жин хасах зориулалттай GLP-1 төрлийн эмийн хэрэглээг эрүүл мэндийн даатгалдаа хамруулах эсэхээ эргэцүүлж эхэлжээ. Гэхдээ тураах үйлчилгээтэй эмийн хэрэглээ байгууллагуудын зардлыг өсгөж байгаа ч урт хугацаанд ажилтнуудын эрүүл мэндэд үзүүлэх үр өгөөжийг нь харгалзан даатгалын хамрах хүрээг хэвээр хадгалах компаниуд ч байна. Тухайлбал, АНУ-ын “Bank of America” банкны гүйцэтгэх захирал Брайан Мойнихан ажилтнуудынхаа GLP-1 төрлийн эмийн хэрэглээнд жил бүр 250 орчим сая ам.долларын зардал гаргадаг гэж мэдэгджээ. Тэрбээр мөн өмнө нь ийм төрлийн зардал огт гардаггүй байсныг онцлов. Гэсэн хэдий ч Мойнихан эдгээр эмийн хэрэглээ урт хугацаанд эрүүл мэндийн үр өгөөж авчирна гэж үзэж байгаа тул уг зардлыг “зөв хөрөнгө оруулалт” хэмээн тодорхойллоо.

Даатгалын хамрах хүрээ гурван жилийн хугацаанд анх удаа буурчээ Эрсдэлийн удирдлага, зөвлөх үйлчилгээний “Willis Towers Watson” компанийн судалгаагаар 100 гаруй ажилтантай байгууллагуудын 53 хувь нь жин хасах GLP-1 төрлийн эмийг эрүүл мэндийн даатгалдаа хамруулж байгаа аж. Уг үзүүлэлт өнгөрсөн онд 57 хувь байсан бөгөөд сүүлийн гурван жилийн хугацаанд анх удаа буурчээ. Түүнчлэн GLP-1 төрлийн эмийг даатгалдаа хамруулдаг ажил олгогчдын 16 хувь нь уг хамрах хүрээг цуцлах талаар хэлэлцэж байгаа нь өмнөх оноос 7 хувиар өссөн үзүүлэлт юм. Энэ өөрчлөлт нь ажил олгогчид эмийн хүртээмжийг нэмэгдүүлэхээс илүүтэй санхүүжилтийн нөхцөлөө эргэн харахад анхаарч эхэлснийг илтгэж байна. Түүнчлэн эрүүл мэндийн даатгалын зардал цаашид ч өсөх төлөвтэй байгаа юм. Тодруулбал, “Marsh” компанийн судалгаагаар АНУ-ын нэг ажилтанд ногдох эрүүл мэндийн даатгалын зардал 2027 онд дунджаар 8.2 хувиар нэмэгдэхээр тооцоолжээ.

Компаниуд эмийн зардлыг санхүүжүүлэх өөр хувилбар хайж байна Үүний зэрэгцээ даатгалын зардлаа хязгаарлахын тулд зарим ажил олгогч эм үйлдвэрлэгчдийн шууд борлуулалтын сувгийг ашиглах боломжийг ажилтнууддаа санал болгож эхэлжээ. Тухайлбал, Данийн эм үйлдвэрлэгч “Novo Nordisk”-ийн NovoCare, АНУ-ын “Eli Lilly” компанийн LillyDirect зэрэг платформоор дамжуулан эм худалдан авах хувилбарууд бий. Ийм сувгийг ашигласнаар ажилтнууд эмээ уламжлалт даатгалын хөтөлбөрөөс гадуур авах боломжтой ч төлбөрийг хэн, ямар хэмжээгээр хариуцах нь байгууллагын бодлогоос хамаарч байна. Мөн “CVS Weight Management”, “Noom”, “Omada Health”, “Vida Health”, “Virta” зэрэг эрүүл мэндийн үйлчилгээ, жингийн менежментийн хөтөлбөр ажил олгогчдод эмийн хэрэглээг бусад эрүүл мэндийн үйлчилгээтэй хослуулах хувилбар санал болгож буй.