Монголд тархины харвалтын дундаж нас бусад орныхоос 10 насаар залуу байна

Монгол Улсад тархины харвалтаар өвчилж буй иргэдийн дундаж нас 59 байгаа нь бусад орныхоос 10 насаар бага үзүүлэлт болохыг мэргэжилтнүүд мэдээллээ. Аравдугаар сарын 29-нд тохиох Тархины харвалттай тэмцэх дэлхийн өдрийг угтан зохион байгуулсан хэвлэлийн бага хурлын үеэр Монгол Улсад 100,000 хүн тутмын 200 нь тархины харвалтаар өвчилдөг болохыг онцолсон байна.

Хэвлэлийн бага хуралд Анагаах ухааны хүрээлэнгийн Мэдрэлийн эмгэг судлалын сектор болон Тархины харвалтын нийгэмлэгийн төлөөлөл оролцож, өвчлөл, нас баралт, урьдчилан сэргийлэх боломж болон үндэсний хэмжээнд хийж буй судалгааны талаар мэдээлэл өгчээ.

Мэргэжилтнүүдийн танилцуулснаар дэлхий даяар жил бүр 12–13 сая хүн тархины харвалтаар өвчилж, таван сая орчим хүн нас бардаг бол 4.5 сая орчим хүн хөгжлийн бэрхшээлтэй үлддэг байна.

Түүнчлэн Монгол Улсад тархины харвалтын улмаас нас барж буй хүмүүсийн дийлэнхийг эрэгтэйчүүд эзэлдэг гэж мэдээлэв. Харин дэлхийн хэмжээнд эмэгтэйчүүдийн өвчлөл өндөр байгааг мэргэжилтнүүд дурдсан бөгөөд уг ялгааг үндэсний хэмжээний судалгаагаар нарийвчлан тогтоох шаардлагатай гэж үзэж байна.

Архангай, Хөвсгөл аймагт харвалтын өвчлөл улсын дунджаас өндөр гарчээ Монгол Улс тархины харвалтын өвчлөлийг үндэсний хэмжээнд анх удаа судалж байгаа бөгөөд урьдчилсан дүнгээр Архангай, Хөвсгөл аймагт өвчлөл улсын дунджаас өндөр гарсан байна. Гэхдээ судалгааны эцсийн үр дүн хараахан гараагүй тул эдгээр аймгийн өвчлөлийн түвшин улсын дунджаас хэдэн хувиар өндөр байгааг одоогоор тодорхой мэдээлээгүй байна.

Уг судалгаагаар орон нутаг бүрийн өвчлөлийн түвшин, тархалтын ялгааг тодорхойлж, Монгол Улс дахь тархины харвалтын нөхцөл байдлыг илүү нарийвчлалтай үнэлэхээр зорьж байгаа юм.

Тархины харвалтын 80–90 хувийг урьдчилан сэргийлэх боломжтой Мэргэжилтнүүдийн мэдээлснээр тархины харвалтын нийт тохиолдлын 80–90 хувийг урьдчилан сэргийлэх боломжтой аж. Түүнчлэн хүйтний улиралд өвчлөл нэмэгддэг талаар судалгааны үр дүнг танилцуулж, энэ үед артерийн даралт болон өдөр тутмын амьдралын хэвшилдээ онцгой анхаарахыг зөвлөжээ.

Ялангуяа агаарын бохирдол нэмэгддэг улиралд эрүүл мэндийн эрсдэлт хүчин зүйлсээ тогтмол хянах шаардлагатайг онцолсон байна. Тархины харвалттай тэмцэх дэлхийн өдрийг олон улсад 2006 оноос тэмдэглэж эхэлсэн бол Монгол Улсад 2009 оноос уг өвчний талаарх мэдлэг, мэдээллийг олон нийтэд түгээж эхэлжээ.