“Meta”-ийн сурталчилгааны орлого “Google”-ийн хайлтын бизнесийг гүйцэж эхэллээ

Интернэт сурталчилгааны зах зээлд сүүлийн 20 орчим жил тэргүүлсэн “Google”, “Meta” компаниудын бизнесийн өсөлт хиймэл оюуны хэрэглээ өргөжихийн хэрээр зөрүү нь нэмэгдэж байна. Тодруулбал, “Meta” хиймэл оюуны тусламжтай сурталчилгааны бизнесээ эрчимтэй тэлж байгаа бол “Google” хэрэглэгчдийн мэдээлэл хайх дадал өөрчлөгдөх эрсдэлтэй тулгарч байгаа юм. “Meta”-ийн сурталчилгааны орлого гуравдугаар улирадп өмнөх оны мөн үеийн 50.1 тэрбум ам.доллараас 63.1 тэрбум ам.долларт хүрч, 26 хувиар өссөн байна. Харин “Google”-ийн хайлтын болон холбогдох үйлчилгээний орлого 12 хувиар нэмэгдэж, 63.4 тэрбум ам.доллар болжээ. Ингэснээр хоёр бизнесийн өсөлтийн зөрүү 14 хувьд хүрсэн нь 2021 оноос хойших “Meta”-д хамгийн өндөр ашигтай зөрүү болов.

Хиймэл оюун “Meta”-ийн сурталчилгааны үр ашгийг нэмэгдүүлж байна “Apple” компани 2021 онд iOS үйлдлийн системийн нууцлалын бодлогоо өөрчилснөөр “Meta”-ийн хэрэглэгчдийн мэдээлэлд тулгуурлан сурталчилгаа үзүүлэх боломж нь хумигдсан. Улмаар 2022 онд тус компанийн жилийн орлого түүхэндээ анх удаа агшжээ. Үүнээс хойш “Meta” хиймэл оюунд суурилсан сурталчилгааны технологио хөгжүүлж, бизнесүүдэд зорилтот хэрэглэгчдээ илүү үр ашигтай тодорхойлох боломж олгож эхэлсэн байна. Тухайлбал, компанийн санхүү хариуцсан захирал Сьюзан Лигийн мэдээлснээр, “Meta AI” бизнесийн туслахын зөвлөмжийг ашигласан сурталчилгаа захиалагчдын уг зөвлөмжийг ашиглаагүй захиалагчдынхаас бараг 5 хувиар өндөр байжээ. Мөн тэдний сурталчилгааны зарцуулалт 9 хувиар илүү байсан аж. Мөн агч модны сироп үйлдвэрлэгч “Simply Organic Maple” тус системийг ашигласнаар худалдан авалтын тоо нь 57 хувиар өсч , нэг худалдан авалт татах зардал 36 хувиар буурсныг компанийн удирдлага онцолсон байна. “Meta”-ийн бараг сая орчим сурталчилгаа захиалагч гуравдугаар улиралд хиймэл оюуны технологид суурилсан хэрэгслүүдээс багадаа нэгийг ашиглажээ.

Google-ийн хайлтын бизнес шинэ өрсөлдөөнтэй тулгарч байна “Google”-ийн хувьд хиймэл оюун сурталчилгааны бүтээгдэхүүнээ сайжруулах боломж олгож байгаа ч үндсэн хайлтын бизнесийнх нь орлогын загварыг өөрчилж болзошгүй байна. Өмнө нь хэрэглэгчид “Google”-ээр мэдээлэл хайж, үр дүнгийн холбоосоор дамжин бусад вебсайтад нэвтэрдэг байсан. Харин ChatGPT, Claude зэрэг чатбот хэрэглэгчдийн асуултад шууд хариулж, олон холбоос дарах хэрэгцээг багасгаж байна. “Google” өөрөө ч хиймэл оюуны AI Overviews, AI Mode үйлчилгээгээрээ хайлтын үр дүнг хураангуй хэлбэрээр хүргэж эхэлсэн. Компанийн мэдээлснээр хайлтын хүсэлтийн тоо гуравдугаар улиралд түүхэн дээд түвшинд хүрсэн ч хайлтын бизнесийн орлогын өсөлт саарчээ. Зах зээлийн судалгааны “Emarketer” компанийн шинжээч Нэйт Эллиоттын үзэж буйгаар, хэрэглэгчид хэрэгцээтэй мэдээллээ ChatGPT болон бусад чатботоос илүү үр ашигтай олж эхэлбэл сүүлийн хэдэн арван жил тогтвортой байсан хайлтын дадал өөрчлөгдөж, “Google”-ийн сурталчилгааны бизнест “ноцтой эрсдэл” үүсч болзошгүй юм. Гэхдээ хайлтын орлогын өсөлт саарсан нь хэрэглэгчид чатбот руу шилжсэнээс шууд шалтгаалсан гэдгийг одоогоор тус нийтлэлд тоон баримтаар тогтоогоогүй байна.

Хөрөнгө оруулалтын зардал өсч, өгөөжийн эргэлзээ нэмэгджээ “Google” энэ онд хиймэл оюуны дэд бүтэц болон бусад үндсэн хөрөнгөд 205 тэрбум ам.доллар хүртэл, “Meta” 145 тэрбум ам.доллар хүртэл зарцуулахаар төлөвлөсөн. Эдгээр хөрөнгө оруулалт нь дата төв, тооцооллын хүчин чадал, хиймэл оюуны загвар хөгжүүлэх дэд бүтцийг өргөжүүлэхэд чиглэж буй. Гэвч эдгээр төслийн өндөр өртөг хоёр компанийн чөлөөт мөнгөн урсгалд сөргөөр нөлөөлж, хөрөнгө оруулагчдын болгоомжлолыг нэмэгдүүлжээ. Тодруулбал, “Alphabet”-ийн санхүүгийн гуравдугаар улирлын тайлангийн дараа хувьцааны ханш нь нэг өдрийн дотор 12 гаруй хувиар унаж, зах зээлийн үнэлгээнээс нь 500 орчим тэрбум ам.доллар арчигдсан. Харин “Meta”-ийн хувьцааны ханш аравдугаар сард нийт 14 хувиар буурсан нь сарын дүнгээр 2022 оны аравдугаар сараас хойших хамгийн тааруу үзүүлэлт болсон байна. Хоёр компанийн орлогын бүтцэд мөн томоохон ялгаа бий. “Meta” нийт орлогынхоо 98 хувийг сурталчилгаанаас бүрдүүлдэг бол “Google”-ийн толгой компани “Alphabet”-ийн хувьд сурталчилгааны орлогын нийт орлогод эзлэх хувь 60 хувиас буурчээ.