Aramco Саудын Арабын хиймэл оюуны HUMAIN компанийн 49 хувийг эзэмших хэлцлээ хаалаа
Саудын Арабын Aramco хиймэл оюуны HUMAIN компанийн 49 хувийг эзэмших хэлцлийг албан ёсоор хааж, энэ онд ойролцоогоор 9.9 тэрбум риал буюу 2.6 тэрбум ам.доллар бэлнээр оруулахаар боллоо. Үлдсэн 51 хувийг Үндэсний хөрөнгө оруулалтын сан (PIF) эзэмшсээр байна.
Саудын Арабын Үндэсний хөрөнгө оруулалтын сан (PIF) болон газрын тосны аварга Saudi Aramco 11-р сарын 1-нд тус улсын хиймэл оюуны үндэсний компани HUMAIN-ий хувьцааны бүтцийг өөрчлөх хэлцлээ хаасан тухай хамтарсан мэдэгдэл гаргалаа. Ингэснээр Aramco өөрийн бүрэн эзэмшлийн охин компаниар дамжуулан HUMAIN-ий 49 хувийг эзэмших болж, PIF 51 хувийн хяналтын багцаа хадгалж үлджээ.
Хэлцлийн нөхцөлөөр Aramco 2026 онд HUMAIN-д ойролцоогоор 9.9 тэрбум саудын риал (2.6 тэрбум ам.доллар) бэлнээр оруулахаас гадна өөрийн хиймэл оюун, тооцоолол болон дижитал хөрөнгийг компанид шилжүүлнэ. Arab News-ийн мэдээлснээр энэ нь хоёр тал 2025 оны 10-р сарын 28-нд гарын үсэг зурсан, үүрэг хүлээлгэхгүй урьдчилсан тохиролцоог албажуулсан алхам юм.
2025 оны тавдугаар сард байгуулагдсан HUMAIN хиймэл оюуны бүх түвшнийг хамарсан чадавх бий болгохыг зорьж байна. Үүнд шинэ үеийн дата төв, өндөр хүчин чадлын дэд бүтэц ба үүлэн платформ, араб хэлний хамгийн хүчирхэг олон төрлийн мэдээлэл боловсруулдаг (multimodal) хэлний загваруудын нэг болох ALLaM зэрэг дэвшилтэт загвар, салбарын шийдлүүд багтана. Компани 2030 он гэхэд 3 гигаватт хүчин чадалтай хиймэл оюуны дата төв ашиглалтад оруулж, дэлхийн тэргүүлэх "хиймэл оюун экспортлогч"-ийн нэг болох зорилт тавьжээ.
Мэдэгдэлд дурдсанаар Aramco HUMAIN-ий дэд бүтцийг ашиглан хиймэл оюуны дэвшилтэт боломжуудыг үйлдвэрлэлийн бодит хэрэглээнд нэвтрүүлж, өөрийн бизнесийн экосистем болон дэлхий даяарх үйл ажиллагаагаа бэхжүүлэхээр төлөвлөж байна. Хувьцаа эзэмшигч, стратегийн түнш болохын хувьд Aramco болон түүний охин компаниуд HUMAIN-ий дэд бүтэц, шийдэл, үйлчилгээг ашиглах юм. Argaam-ийн мэдээлснээр энэ хамтын ажиллагаа PIF-ийн 2026–2030 оны стратегид нийцэх бөгөөд эдийн засгийн экосистемүүдийн уялдааг гүнзгийрүүлж, үндэсний компаниудыг дэлхийн өрсөлдөх чадвартай тоглогч болгон өсгөх зорилготой.
Персийн булангийн орнууд газрын тосны орлогоос хамаарлаа бууруулах стратегийнхаа хүрээнд хиймэл оюуны дэд бүтцэд асар их хөрөнгө оруулсаар байгаа бөгөөд дэлхийн хамгийн том эрчим хүчний компанийн энэ алхам Саудын Араб уг салбарт томоохон тоглогч болох эрмэлзлээ улам тодотгож байна.
Эх сурвалж: Aramco, Saudi Press Agency, Arab News, Argaam. Зураг: Saudi Press Agency (SPA)
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
