“OpenAI” босгох хөрөнгийн зорилтоо $30 тэрбумаас $20 тэрбум болгон бууруулжээ

“OpenAI” компани хөрөнгө оруулалтын шинэ шатанд татахаар төлөвлөсөн санхүүжилтийн хэмжээгээ 10 тэрбум ам.доллароор бууруулж, 20 тэрбум ам.доллар хүртэл хөрөнгө босгохоор зорьж байгааг CNBC агентлаг уг хэлцлийн мэдээлэлтэй ойр эх сурвалжаас баталгаажуулжээ. Гэхдээ хөрөнгө босгох ажиллагаа одоогоор хараахан дуусаагүй байгаа учраас эцсийн дүн өөрчлөгдөх боломжтой юм. Энэ талаар анх мэдээлсэн “Financial Times” сонины мэдээлснээр “OpenAI” компани хөрөнгө оруулалтын дараах үнэлгээгээ 1.25 их наяд ам.долларт хүргэхээр зорьж байгаа аж. Мөн хөрөнгө оруулагчдаас санхүүжилтэд оролцох амлалтаа баасан гарагт багтаан ирүүлэхийг хүссэн бөгөөд зарим хөрөнгө оруулагч анх төлөвлөсөн хөрөнгийн хэмжээгээ бууруулжээ. Хөрөнгө босгох ажиллагааг Арабын Нэгдсэн Эмират Улсын хөрөнгө оруулагчид болон хөрөнгө оруулалтын “Coatue” компани тэргүүлж байгааг CNBC өмнө нь мэдээлсэн.

Хиймэл оюуны хөрөнгө оруулалтын өгөөжид эргэлзэх нь нэмэгджээ “OpenAI” компани хөрөнгө босгох зорилтоо бууруулсан нь технологийн томоохон компаниудын хиймэл оюуны дэд бүтцэд зарцуулж буй хөрөнгө оруулалт хангалттай өгөөж авчрах эсэх асуудал хөрөнгө оруулагчид дунд эргэлзээ дагуулж эхэлсэн үетэй давхцаж байна. Хэдийгээр дата төв байгуулах, график боловсруулах чип буюу GPU худалдан авахад олон тэрбум ам.доллар зарцуулж байгаа ч эдгээр хөрөнгө оруулалтаас олох орлого, ашгийн хэмжээ тодорхойгүй хэвээр байгаа нь зах зээлийн гол анхаарах асуудлын нэг болжээ. Хиймэл оюуны салбартай холбоотой компаниудын хувьцааны ханш баасан гарагийн арилжаагаар огцом буурсан. Тухайлбал, чип үйлдвэрлэгч “Intel” компанийн хувьцааны ханш орлогын тааруу төлөвийн дараа 25 хувиар унасан бол “Micron”-ийнх 5.5 хувиар буурч, “Nvidia”-ийнх 4 хувиар уруудаад буй. Үүний зэрэгцээ “Microsoft”, “Alphabet”, “Amazon” компаниуд хиймэл оюуны дэд бүтцийн эрэлтийг хангахын тулд сүүлийн жилүүдэд хөрөнгө оруулалтаа эрчимтэй нэмэгдүүлсэн. Гэвч өнгөрсөн долоо хоногт танилцуулсан хөрөнгийн зардлын үзүүлэлт болон санхүүгийн төлөв нь шинжээчдийн хүлээлтээс доогуур гарсан байна. “Alphabet” компанийн хайлтын үйлчилгээний орлого зах зээлийн хүлээлтэд хүрээгүйн улмаас хувьцааны ханш нь пүрэв гарагт түүхэн дэх хамгийн тааруу арилжааны өдрөө үзүүлжээ. Компанийн бизнес хариуцсан захирал Филипп Шиндлерийн тайлбарласнаар хайлтын орлогод нөлөөлсөн хүчин зүйлсийн нэг нь хиймэл оюунд суурилсан “AI Mode” үйлчилгээний орлого олох түвшин харьцангуй бага байсантай холбоотой аж.