АНУ-ын эдийн засгийн өсөлт эрчимжсэн ч инфляц сүүлийн дөрвөн сарын дээд түвшинд хүрээд байна

АНУ-ын эдийн засгийн өсөлт гуравдугаар улиралд эрчимжсэн ч эрчим хүчний үнийн өсөлт инфляцыг дахин хөөрөгдөж, Холбооны нөөцийн банкны мөнгөний бодлогыг хүндрүүлж байна. Тус улсын Худалдааны яамнаас пүрэв гарагт танилцуулсан мэдээллээр, дотоодын нийт бүтээгдэхүүн гуравдугаар улиралд өмнөх оноос 3.4 хувиар өсч, эдийн засагчдын 3.0 хувийн таамгийг давжээ. Үүний зэрэгцээ инфляц есдүгээр сард 3.6 хувьд хүрч, өмнөх сараас 0.5 хувиар өссөнөөр сүүлийн дөрвөн сарын дээд түвшинд очоод байна. Мөн Холбооны нөөцийн банкны зорилтот 2 хувийн түвшнээс өндөр хэвээр байгаа юм. Мөн хүнс, эрчим хүчийн хасч тооцсон суурь инфляц тайлант хугацаанд 3.1 хувьд хүрч, өмнөх сараас 0.3 хувиар нэмэгдэв.

Хэрэглээний өсөлт саарч, өрхийн хуримтлал буурлаа АНУ-ын эдийн засгийн өсөлтийн гол хөдөлгөгч хүчин зүйл нь өрхийн хэрэглээ харьцангуй тогтвортой хэвээр байна. Гуравдугаар улиралд хэрэглээний зардал жилийн дүнгээр 3.8 хувиар өсчээ. Өрхийн хэрэглээ тус улсын ДНБ-ий гуравны хоёроос илүү хувийг бүрдүүлдэг. Гэвч сарын үзүүлэлтээр хэрэглээний өсөлт саарсан байна. Есдүгээр сард америкчуудын хэрэглээний зардал өмнөх сараас 0.5 хувиар өссөн нь өмнөх сарын 0.9 хувийн өсөлтөөс бага үзүүлэлт юм. Харин инфляцыг хасч тооцвол бодит хэрэглээ өмнөх сарын түвшинд тогтвортой хадгалагджээ. Үүний зэрэгцээ иргэдийн орлогын өсөлт удааширч, хуримтлал буурсан байна. Есдүгээр сард хувийн орлогын өсөлт 0.2 хувьд хүрч, өмнөх сараас 0.1 хувиар саараад буй. Түүнчлэн инфляцыг тооцсон, татварын дараах бодит орлого 0.3 хувиар буурсан байна. Мөн хрхийн татварын дараах орлогод эзлэх хуримтлалын хувь 0.2 хувиар буурч, 3.8 хувьд хүрсэн нь сүүлийн дөрөв орчим жилийн доод түвшин болжээ. “Life360” компанийн ахлах эдийн засагч Элизабет Рентерийн тайлбарласнаар, америкчуудын хэрэглээ эдийн засгийн өсөлтийг тэтгэж байгаа ч инфляцын нөлөө өрх бүрд харилцан адилгүй тусч байна. Ялангуяа үнийн өсөлт зарим өрхийн санхүүгийн нөхцөл байдлыг бусдаас илүү хүндрүүлж байгаа юм. Хиймэл оюуны хөрөнгө оруулалт эдийн засгийн өсөлтөд голлон нөлөөлжээ Гуравдугаар улиралд бизнесийн хөрөнгө оруулалтын өсөлт эрчимжсэн нь АНУ-ын эдийн засгийн тоон үзүүлэлт хүлээлтээс давсан гол хүчин зүйлсийн нэг болжээ. Компаниуд хиймэл оюуны дата төв болон холбогдох дэд бүтцийн хүчин чадлаа нэмэгдүүлэхээр хөрөнгө оруулалтаа тэлснээр бизнесийн хөрөнгө оруулалтын жилийн дүнд шилжүүлсэн өсөлт өмнөх улирлын 9 хувиас 12.7 хувьд хүрсэн байна. Харин гадаад худалдаа эдийн засгийн өсөлт саарахад нөлөөлжээ. Тодруулбал, гуравдугаар улиралд экспорт жилийн дүнгээр 5.7 хувиар буурсан бол импорт бараг 20 хувиар өссөн байна. Импортын огцом өсөлт нь Канадын бараанд ногдуулах тариф хэрэгжиж эхлэхээс өмнө компаниуд нөөцөө урьдчилан нэмэгдүүлсэн, мөн дата төвийн тоног төхөөрөмжийн худалдан авалт өссөнтэй холбоотой байж магадгүй хэмээн шинжээчид тайлбарлаж буй. Арванхоёрдугаар сард бодлогын хүү дахин өсч магадгүй АНУ-ын Холбооны нөөцийн банк өнгөрсөн сард бодлогын хүүгээ сүүлийн гурван жилийн хугацаанд анх удаа нэмэгдүүлсэн бөгөөд лхагва гарагийн хурлаар ч мөн адил хүүг өөрчлөлгүй хэвээр үлдээсэн. Төв банк дараагийн шийдвэрээ гаргахаас өмнө макро эдийн засгийн нэмэлт тоон үзүүлэлтүүдийг харгалзан үзэхээр байгаа юм. Гэвч эдийн засгийн өсөлт хүлээлтээс өндөр, инфляц зорилтот түвшнээс давсан хэвээр байгаа энэ үед арванхоёрдугаар сарын хурлаар бодлогын хүүг багадаа 0.25 нэгж хувиар нэмэгдүүэх өндөр магадлалтай байна. “Fitch Ratings” агентлагийн АНУ-ын эдийн засгийн судалгааны тэргүүн Олу Сонолагийн үзэж буйгаар, хиймэл оюуны салбарын хөрөнгө оруулалт болон хэрэглэгчдийн идэвхтэй зарцуулалт мөнгөний бодлого чангарч байгаа ч эдийн засгийн өсөлтийг өндөр түвшинд хадгалж байна. Түүний тайлбарласнаар, Холбооны нөөцийн банк инфляцыг хазаарлахаар мөнгөний бодлогоо чангаруулж байгаа ч эдийн засгийн идэвхжил төдийлөн саараагүй байна. Сүүлийн тайлангууд арванхоёрдугаар сард хүүг дахин нэмэгдүүлэх шийдвэр гаргах нэмэлт үндэслэл болж байгааг мөн онцолжээ.