Монгол Улс энхийг сахиулах ажиллагаанд оролцож буй эмэгтэй цэргийн алба хаагчдын эзлэх хувийг 15-д хүргэжээ
Монгол Улс НҮБ-ын энхийг сахиулах ажиллагаанд оролцож буй эмэгтэй цэргийн алба хаагчдын эзлэх хувийг 2027 он гэхэд 15 хувьд хүргэх зорилтоо хугацаанаас нь өмнө биелүүлснээ мэдэгдлээ.
Нэгдсэн Үндэстний Байгууллагын дэргэд суугаа Монгол Улсын Байнгын төлөөлөгч Н.Анхбаяр Эмэгтэйчүүд, энх тайван, аюулгүй байдлын асуудлаарх НҮБ-ын Аюулгүйн Зөвлөлийн хуралдаанд оролцож, Монгол Улс энхийг сахиулах ажиллагаанд оролцож буй эмэгтэй цэргийн алба хаагчдын эзлэх хувийг 15-д хүргэх зорилтоо 2027 оноос өмнө биелүүлснийг мэдэгдэв.
Тэрбээр Монгол Улс энх тайван, аюулгүй байдлыг хангах үйл ажиллагаанд эмэгтэйчүүдийн оролцоог нэмэгдүүлэх чиглэлээр хэрэгжүүлж буй арга хэмжээ, цаашдын зорилтуудыг танилцуулжээ.
Монгол Улс мөн эмэгтэйчүүд, энх тайван, аюулгүй байдлын асуудлаарх анхны Үндэсний үйл ажиллагааны төлөвлөгөөг боловсруулж эхэлсэн байна. Уг баримт бичиг нь энэ чиглэлээр хэрэгжүүлэх бодлого, арга хэмжээг үндэсний түвшинд тодорхойлоход чиглэх юм. Гэхдээ төлөвлөгөө одоогоор боловсруулах шатандаа байгаа бөгөөд хэрэгжүүлэх арга хэмжээ, батлах хугацааны талаар дэлгэрэнгүй мэдээлэл өгөөгүй байна.
Үүний зэрэгцээ Монгол Улс 2027 онд эмэгтэйчүүд, энх тайван, аюулгүй байдлын асуудлаар олон улсын бага хурал зохион байгуулахаар төлөвлөжээ. Тус хурлын тов, оролцогчид болон хэлэлцэх асуудлын талаарх мэдээлэл одоогоор тодорхойгүй байна.
Монгол Улс НҮБ-ын Аюулгүйн Зөвлөлийн 2048–2049 оны байнгын бус гишүүний сонгуульд нэрээ дэвшүүлээд байгаа юм.
Холбоотой мэдээ
