Монголын бүлэг жуулчдад зориулсан визийн туршилтыг БНСУ эхлүүлжээ
Тав болон түүнээс дээш хүний бүрэлдэхүүнтэй бүлэг жуулчдад C-3-2 виз олгох туршилт 2027 оны аравдугаар сарын 31 хүртэл үргэлжилнэ.
БНСУ Монголын бүлэг жуулчдад зориулсан C-3-2 визийг аравдугаар сарын 30-наас туршилтаар нэвтрүүлжээ. Монгол иргэдийн тус улсад бүлгээр аялах үйл явцыг хөнгөвчлөх зорилготой уг зохицуулалтыг 2027 оны аравдугаар сарын 31 хүртэл хэрэгжүүлэхээр болсныг БНСУ-ын Хууль зүйн яам мэдээлсэн байна.
Визийн туршилтад Монгол дахь БНСУ-ын Элчин сайдын яамнаас сонгосон долоон аяллын компаниар дамжуулан бүрдүүлсэн, тав болон түүнээс дээш хүний бүлэг хамрагдах боломжтой. Виз авсан жуулчид тус улсад 15 хүртэл хоног аялах эрхтэй болно.
Туршилтын хугацаанд байгууллагын ажилтнуудаа урамшуулах болон сургалтад хамруулах аялал, сурагчдын аяллын бүлгийг голлон хамруулахаар төлөвлөжээ.
Үүний зэрэгцээ жуулчдын нэрсийг урьдчилан шалгаж, хилээр нэвтрэх хязгаарлалттай болон өмнө нь хууль бусаар оршин сууж байсан иргэд уг зохицуулалтыг ашиглан нэвтрэхээс сэргийлэх юм. Аяллын бүлгээс зөвшөөрөлгүй салж үлдэх тохиолдол гарвал хариуцсан аяллын компанид захиргааны арга хэмжээ авахаар байна.
БНСУ-ын Хууль зүйн яам туршилтын үр дүнг үнэлсний дараа бүлгийн визийн зохицуулалтыг байнгын болгох эсэх, хамрах хүрээг өргөжүүлэх асуудлыг шийдвэрлэхээр төлөвлөжээ.
Холбоотой мэдээ
