"Starbucks"-ийн Хойд Америк дахь борлуулалт сэргэж, ашиг нь шинжээчдийн таамгийг давлаа

“Starbucks” 2026 оны есдүгээр сарын 27-ноор дууссан санхүүгийн дөрөвдүгээр улиралд ашиг нь 677.2 сая ам.долларт хүрч, өмнөх оны мөн үеийн 133.1 сая ам.доллароос огцом өсч, нэгж хувьцаанд ногдох ашиг 0.12 ам.доллароос 0.59 ам.доллар босныг мэдээллээ. Мөн бүтэц, зохион байгуулалтын өөрчлөлт болон хөрөнгийн элэгдлийг зардлыг хасч тооцсон ашиг нэгж хувьцаанд 0.80 ам.долларт хүрсэн байна.

Гүйцэтгэх захирал Брайан Никколын хэрэгжүүлж буй “Back to Starbucks” стратегийн хүрээнд кофе шопуудын үйлчилгээний чанарыг сайжруулж, орчныг тухтай болгон, маркетингаа идэвхжүүлсэн нь хэрэглэгчдийг дахин татахад нөлөөлжээ. Тухайлбал, Америкийн зах зээлд хулууны латте болон матча ундааны борлуулалт түүхэн дээд хэмжээнд хүрсэн бөгөөд матча цай 1 тэрбум ам.долларын борлуулалттай бүтээгдэхүүн болжээ. Мөн АНУ болон Канадад 1,700 гаруй салбарын дотоод тохижилт, гэрэлтүүлэг, суудлын тоог нэмэгдүүлснээр гүйлгээний тоо буюу хэрэглэгчдийн урсгал өссөн байна.

Олон улсын зах зээлийн саатал ба бүтцийн өөрчлөлт

Гэхдээ Хойд Америкийн зах зээлээс гаднах олон улсын ижил нэгж дэлгүүрийн борлуулалт тайлант хугацаанд ердөө 0.9 хувиар өссөн нь шинжээчдийн 3.2 хувийн өсөлтийн таамагт хүрсэнгүй. Хэрэглэгчдийн урсгал тааруу байсан нь үүнд голлон нөлөөлжээ. Дэлхийн хэмжээнд ижил нэгж дэлгүүрийн борлуулалт 7.2 хувиар өссөн бөгөөд нийт хэрэглэгчдийн тоо 1.8 хувиар нэмэгдсэн байна.

Тус компани Хятад дахь бизнесээ хамтарсан үйлдвэрийн загварт шилжүүлснээс гадна олон улсын ихэнх салбараа франчайзинг загвараар орон нутагт шилжүүлж буй. Мөн компани өөрчлөн байгуулалтын хүрээнд Хойд Америк дахь сүлжээнийхээ 1 орчим хувь буюу 250 орчим салбараа хаахаар төлөвлөсөн бөгөөд тайлант улиралд цэвэр дүнгээр 303 шинэ салбар нээжээ.

2027 оны төлөв ба зах зээлийн визишн Компанийн Санхүү эрхэлсэн захирал Кэти Смитийн мэдээлснээр 2027 санхүүгийн жилд кофены түүхий эдийн ханш ялимгүй буурах төлөвтэй байгаа бөгөөд Хойд Америкт шинээр нээх салбарын тоог багасгах нь тухайн жилийн нийт орлогод тодорхой хэмжээгээр нөлөөлөхөөр байна.

Үүний зэрэгцээ компани 2027 санхүүгийн жилд нэгж хувьцаанд ногдох тохируулсан ашгаа 3.15-3.25 ам.доллар байхаар таамаглаж байгаа нь Уолл Стритийн 3.14 ам.долларын таамаглалаас өндөр дүн болж буй. Гэсэн хэдий ч нийт орлого 1 хувиар буурах төлөвтэй байгаа нь шинжээчдийн таамаглаж байсан 1.4 хувийн өсөлтөөс догуур байгаа юм. Түүнчлэн Хойд Америк дахь ижил нэгж дэлгүүрийн борлуулалтыг 4 хувиар өснө гэж тооцоолжээ. Ашиг болон орлогын энэхүү төлөв ба олон улсын борлуулалтын бууралтын мэдээний дараа “Starbucks”-ийн хувьцааны ханш арилжааны бус цагаар 2 хувиар буурсан байна.