Ажлын дараа гэртээ уулзах эхний хоёр хором хосын харилцаанд яагаад чухал вэ?

Ажлаа тараад гэртээ ирэх, аяллаас буцах эсвэл хэсэг хугацаанд тусдаа байсны дараа дахин уулзах эхний нэгээс хоёрхон минут хосын харилцаанд төсөөлснөөс ч илүү ач холбогдолтой байж болохыг сэтгэл зүйч Марк Траверс онцоллоо.

Түүний үзэж байгаагаар дахин уулзах энэ богино мөч нь ердийн мэндчилгээнээс гадна хосуудын дотнын холбоог сэргээж, хамтдаа өнгөрүүлэх цагийн эхлэлийг тавих боломж олгодог байна.

Өдрийн турш тус тусдаа ажиллаж, өөр орчинд байсан хүмүүс гэртээ ирэхдээ ядарсан, ууртай эсвэл сэтгэл догдолсон аль нь ч байж болно. Иймээс уулзсаны дараах үг, дуу хоолойн өнгө, анхаарал хандуулж буй байдал нь цаашдын харилцааны уур амьсгалд нөлөөлөх боломжтой аж.

Дахин уулзах эхний минут яагаад чухал вэ?

Марк Траверсийн тайлбарласнаар хосууд дахин уулзах мөч гурван үндсэн үүрэгтэй.

Нэгдүгээрт, өдрийн турш ажил, бусад асуудалд төвлөрсөн анхаарлаа хамтрагчдаа хандуулахад тусалдаг. Ингэснээр хоёр хүн тус тусын орчноос хамтын цаг хугацаанд аажмаар шилжих боломжтой.

Хоёрдугаарт, хамтрагчийнхаа сэтгэл хөдлөлийг анзаарах боломж бүрдүүлдэг. Тухайн хүн баяртай, ядарсан эсвэл ямар нэг зүйлд санаа зовсон байгааг анзаарч, түүнд тохируулан харилцах нь үл ойлголцлоос сэргийлэхэд тустай.

Гуравдугаарт, өдрийн турш тохиолдсон үйл явдлын талаар мэдээлэл солилцох эхлэлийг тавьдаг. Энэ нь заавал урт яриа байх шаардлагагүй бөгөөд богинохон асуулт ч хамтрагчдаа анхаарал хандуулж буйг илэрхийлнэ.

“Өдөр хэр өнгөрөв?” гэх энгийн асуулт чухал байж болно

Дахин уулзахдаа хамтрагчийнхаа өдөр болсон үйл явдлыг сонирхох нь харилцааны холбоог хадгалах энгийн аргуудын нэг юм.

Тухайлбал, “Өдөр нь хэр өнгөрөв?”, “Өнөөдрийн илтгэл нь амжилттай болсон уу?”, “Ажил дээр нь юу болсон бэ?” гэх мэт энгийн асуулт тавьж болно.

Эдгээр асуултын гол зорилго нь мэдээлэл авах төдий бус, хамтрагчийнхаа амьдралд болж буй үйл явдал, сэтгэл хөдлөлийг сонирхож байгааг илэрхийлэхэд оршино.

Гэхдээ асуулт тавихаас илүүтэй хариултыг нь анхааралтай сонсох нь чухал. Ярилцаж байхдаа утсаа түр холдуулах, яриаг нь таслахгүй байх, асуудлыг нь шууд шийдэх гэж яарахгүй байх зэрэг энгийн үйлдэл харилцан ойлголцлыг дэмжиж болно.

Хамтрагчдаа амрах хугацаа өгөх нь анхаарал халамжийн нэг хэлбэр

Гэртээ ирсэн даруйдаа ярилцах хүсэл, сэтгэл зүйн бэлэн байдал хүн бүрд адилгүй байдаг.

Зарим хүн өдрийн үйл явдлаа шууд хуваалцахыг хүсдэг бол нөгөө хэсэг нь ажлын дараа хэсэг хугацаанд амрах шаардлагатай ч байж болно.

Ийм үед “Чамтай ярилцахыг хүсч байна. Гэхдээ эхлээд 20 минут амаръя” гэж хэлэх нь харилцаанаас зайлсхийж буй хэрэг бус, өөрийн хэрэгцээг ойлгомжтой илэрхийлж буй хэлбэр юм.

Харин нөгөө хүн энэ хүсэлтийг үл тоомсорлож байна гэж ойлгохын оронд хамтрагчийнхаа амрах хэрэгцээг хүндэтгэх нь чухал.

Өдөр бүрийн товч мэнд, халуун дулаан харилцаа, анхааралтай сонсох дадал нь хосуудын сэтгэл хөдлөлийн холбоог дэмжих боломжтой ч харилцааны чанарыг зөвхөн эхний хоёр минутаар хэмжих боломжгүй бөгөөд харилцан хүндлэл, итгэлцэл, өдөр тутмын тогтвортой харилцаа мөн адил чухал юм.