Д.Батлут Х.Нямбаатарын «хувийн арми»-ийн тухай яриаг үгүйсгэв: «Улсынхаа армийг ч бүрэн дүүрэн тэжээж чадахгүй байгаа»

Батлан хамгаалахын сайд Д.Батлут Нийслэлийн Засаг дарга асан Х.Нямбаатарын «хувийн арми»-ийн тухай яриаг үгүйсгэлээ.

Х.Нямбаатар шууд дамжуулалтдаа Хан-Уул дүүргийн 15 дугаар хороо, Энхтайвны гүүрний зүүн талд 23 давхар барилга баригдаж байгаа бөгөөд түүнийг «Монгол цэргийн нэгдсэн холбоо»-ны албан контор гэж өөрийг нь ажиллаж байхад баталж өгсөн гэж ярьсан. Тэрээр Ерөнхийлөгч У.Хүрэлсүх, сайд Д.Батлут нар цэргийн хоёр том холбоог төрийн бус байгууллагын нэрээр удирдаж байна гэж үзээд, «Хувийн арми байгуулж, үзэл бодлоо илэрхийлсэн иргэдийнхээ эсрэг хөдөлгөх гэж байна уу» гэж асуусан бөгөөд эдгээр холбоо 21 аймаг, 330 суманд төлөөлөлтэй гэжээ. Энэ нь Х.Нямбаатарын мэдэгдэл бөгөөд Ерөнхийлөгчийн Тамгын газар тайлбар өгөөгүй байна.

Eguur.mn-ийн мэдээлснээр, сайд Д.Батлут үүнд хариулахдаа «23 давхар тауэрийн талаарх мэдээлэл надад байхгүй. Янз бүрийн худал мэдээлэл яриад суух юм. Юун хувийн арми. Улсынхаа армийг ч тэжээж, бүрэн дүүрэн чадахгүй байгаа» гэжээ. Тэрээр «Миний хувьд нийгэмд үйлчилдэг төрийн бус байгууллагын удирдах зөвлөлд ажилладаг нь үнэн. Хаана ч нуухгүй» гээд, тус байгууллага үндэсний аюулгүй байдал, эх оронч үзлийг төлөвшүүлэх чиглэлээр ажилладаг гэж тайлбарлав.

Сайдын «улсынхаа армийг ч тэжээж чадахгүй байгаа» гэсэн үг X сүлжээнд шүүмжлэл дагуулж, зарим хэрэглэгч түүнийг огцруулахыг Ерөнхий сайд Н.Учралаас шаардсан бол зарим нь цэргийн нэртэй төрийн бус байгууллагууд олширсныг цэгцлэх шаардлагатай гэж бичжээ.