“Apple”-ийн орлого 12 хувиар өссөн ч ашгийн төлөв хөрөнгө оруулагчдын хүлээлтэд хүрсэнгүй

АНУ-ын технологийн “Apple” компани арваннэгдүгээр сарын 2-нд танилцуулсан санхүүгийн тайлангаараа шинжээчдийн орлогын болон нэгж хувьцаанд ногдох ашгийн таамгийг давуулан биелүүллээ. Гэвч санах ойн чипийн үнэ өсөж, үйлдвэрлэлийн зардал нэмэгдсэнээр дараагийн улирлын ашигт ажиллагаа хүлээлтээс сул байх төлөвтэй байна. Есдүгээр сарын 26-нд дууссан санхүүгийн жилийн дөрөвдүгээр улиралд компанийн орлого 114.48 тэрбум ам.долларт хүрсэн нь Лондоны хөрөнгийн бирж группын нэгтгэсэн шинжээчдийн 113.39 тэрбум ам.долларын таамгаас 1.09 тэрбум ам.доллароор өндөр үзүүлэлт болов. Мөн нэгж хувьцаанд ногдох ашиг 2.10 ам.долларт хүрч, 1.99 ам.долларын хүлээлтийг давсан бол компанийн цэвэр ашиг өмнөх оны мөн үеэс 12 орчим хувиар өсч, 30.71 тэрбум ам.долларт хүрчээ.

“iPhone”-ийн борлуулалт өссөн ч “iPad” хүлээлтэд хүрсэнгүй “Apple”-ийн орлогын өсөлтөд “iPhone” болон “Mac” бүтээгдэхүүний борлуулалт голлон нөлөөлөв. “iPhone загварын гар утасны орлого өмнөх оны мөн үеэс 17.5 хувиар нэмэгдэж, 57.58 тэрбум ам.долларт хүрсэн бол “Mac”-ийн орлого 23.7 хувиар дээшилж, 10.79 тэрбум ам.доллар болсон байна. Харин “iPad”-ийн орлого 6.23 тэрбум ам.доллар болж, шинжээчдийн 6.7 тэрбум ам.долларын таамгаас 7 орчим хувиар доогуур гарлаа. Мөн бусад төхөөрөмж, гэр ахуйн бүтээгдэхүүн болон дагалдах хэрэгслийн орлого 8.3 тэрбум ам.доллар болсон нь 9.06 тэрбум ам.долларын хүлээлтэд хүрсэнгүй. Компанийн тайлант хугацаанд шинээр худалдаанд гаргасан “iPhone 18 Pro” загварын борлуулалтын ердөө найман өдөр багтсан бол шинэ “iPhone Duo” загвар улирал дууссаны дараа худалдаанд гарчээ. Иймээс эдгээр бүтээгдэхүүний борлуулалтын илүү бүрэн үр дүн дараагийн улирлын тайланд тусах юм.

Санах ойн чипийн өртөг ашгийн маржинд нөлөөлж байна Үүний зэрэгцээ “Apple” арванхоёрдугаар сараар дуусах санхүүгийн нэгдүгээрулиралд орлогоо өмнөх оны мөн үеэс 7–10 хувиар өснө гэж таамагласан нь шинжээчдийн 6.1 хувийн өсөлтийн төсөөллөөс өндөр байна. Гэвч компанийн ашгийн нийт орлогод эзлэх хувь 45–46 хувь байх төлөвтэй байгаа нь шинжээчдийн 46.3 хувийн хүлээлтээс доогуур үзүүлэлт болов. Өнгөрсөн улиралд уг үзүүлэлт 47.9 хувь байсан бөгөөд тарифын буцаан олголт нийт ашгийн маржиныг нэг хувииар нэмэгдүүлсэн байна. Дэлхийн зах зээлд санах ойн чипийн нийлүүлэлт тасалдаж, компьютерын эд ангийн эрэлт нэмэгдсэн нь “Apple”-ийн үйлдвэрлэлийн зардлыг өсгөжээ. Компани өнгөрсөн зургаадугаар сард бүтээгдэхүүний үнээ нэмэгдүүлж, “iPhone”-ийн үнийг 100 ам.доллароор өсгөсөн нь эд ангийн зардлын өсөлтийг хэсэгчлэн нөхөхөд тусалсан байна. Мөн тарифын буцаан олголтын нөлөөгөөр нэгж хувьцаанд ногдох ашиг 0.05 ам.доллароор нэмэгдсэнийг компани мэдээлжээ.

Шинэ гүйцэтгэх захирлын анхны санхүүгийн тайлан Энэ тайлан нь есдүгээр сарын 1-нд Тим Күүкийн халааг авсан “Apple”-ийн шинэ гүйцэтгэх захирал Жон Тернусын удирдлага дор танилцуулсан анхны санхүүгийн тайлан юм. Жон Тернус компанийн энэ оны санхүүгийн жилийг түүхэн дэх хамгийн өндөр орлоготой жил болсон хэмээн тодорхойлоод буй. Тус компанийн жилийн нийт орлого 478.83 тэрбум ам.долларт хүрсэн нь өмнөх оны 416.16 тэрбум ам.доллароос 15.1 хувиар өссөн үзүүлэлт юм. Шинэ удирдлагын үед “Apple” бүтээгдэхүүний үнийн өсөлтөөр үйлдвэрлэлийн зардлыг нөхөхийн зэрэгцээ шинэ загваруудын эрэлтийг хадгалах шаардлагатай тулгарч байна. Орлогын өсөлтийн төлөв шинжээчдийн хүлээлтээс өндөр байгаа ч санах ойн чипийн өртөг нэмэгдэж буй нь компанийн ашигт ажиллагааны ойрын хугацааны гол эрсдэл хэвээр байна.