Дарханы ДЦС-ын ажиллагааг сэргээж, 30 МВт-ын горимд шилжүүлжээ

Дархан-Уул аймгийн “Дарханы дулааны цахилгаан станц” ТӨХК-ийн ерөнхий хуваарилах байгууламжид аравдугаар сарын 29-ний 20:56 цагт гэмтэл гарч, станцын үйл ажиллагаа бүрэн зогоод буй.

Харин мэргэжлийн байгууллагууд гэмтсэн тоноглолыг тусгаарлаж, Төвийн бүсийн эрчим хүчний системээс хүчдэл авснаар станцын ажиллагааг сэргээсэн байна. Аравдугаар сарын 30-ны өдрийн мэдээллээр дөрвөн зуух, гурван турбин генератор 30 МВт-ын горимд ажиллаж байгаа аж.

Гэсэн хэдий ч дулаан хангамжийг бүрэн хэвийн болгох ажил үргэлжилж байна. Дархан-Уул аймгийн Засаг даргын мэдээлснээр дулааны сүлжээний усны температурыг шаардлагатай түвшинд хүргэж, ажиллагааг жигдрүүлэхээр мэргэжлийн байгууллагууд ажиллаж байгаа тул зарим хорооллын айл өрхийн дулаан хангамж хэвийн болох хүртэл тодорхой хугацаа шаардагдахаар байна.

Үүссэн нөхцөл байдалтай холбогдуулан Монгол Улсын Шадар сайд, Улсын онцгой комиссын дарга Н.Номтойбаяр Дархан-Уул аймагт ажиллаж, станцын нөхцөл байдалтай танилцжээ. Мэргэжлийн байгууллагууд гэмтлийн шалтгааныг станцын тоног төхөөрөмжийн насжилттай холбоотой байж болзошгүй гэж урьдчилсан байдлаар үзэж байгаа ч эцсийн дүгнэлт гараагүй байна. Мөн станцын тоног төхөөрөмжийг яаралтай худалдан авах шаардлагыг холбогдох албаныханд уламжилжээ.

“Дарханы дулааны цахилгаан станц” нь 1965 оны аравдугаар сарын 2-нд анхны тоноглолуудаа ашиглалтад оруулсан бөгөөд өдгөө 61 жил ажиллаж байна. Тус станц 83 МВт-ын суурилагдсан цахилгаан чадалтай, үйлдвэрлэсэн цахилгаанаа Төвийн эрчим хүчний системд нийлүүлж, Дархан хотын дулаан, хэрэгцээний халуун усны хангамжийг хариуцдаг.