“LS Cable & System” соронзны үйлдвэр байгуулахад $262 саяын хөрөнгө оруулна

БНСУ-ын кабель, эрчим хүчний дэд бүтцийн тоног төхөөрөмж үйлдвэрлэгч “LS Cable & System” компани Умард Кёнсан мужийн Гүми хотод газрын ховор элементийн байнгын соронзны үйлдвэр байгуулахад 350 тэрбум вон хөрөнгө оруулахаар болжээ. Тус компани уг үйлдвэрийг Хятадаас хамааралгүй нийлүүлэлтийн сүлжээний гол үйлдвэрлэлийн төв болгон хөгжүүлж, батлан хамгаалах, робот техник, цахилгаан автомашины салбарт шаардлагатай эд ангийн нийлүүлэлтийг нэмэгдүүлэхээр зорьж байна.

Компанийн охин компани “Korea Motion Works” аравдугаар сарын 29-нд Умард Кёнсан мужийн захиргаа болон Гүми хотын удирдлагуудтай хөрөнгө оруулалтын санамж бичиг байгуулжээ. Төслийг 2026–2029 онд хоёр үе шаттай хэрэгжүүлж, 212 ажлын байр бий болгохоор төлөвлөсөн байна.

Үйлдвэрийн барилгын ажлыг 2027 оны эхний хагаст эхлүүлж, 2028 оны хоёрдугаар хагаст робот техник, цахилгаан автомашинд ашигладаг неодим-төмөр-борын байнгын соронзны үйлдвэрлэлийг эхлүүлэх аж. Улмаар батлан хамгаалах зориулалттай самари-кобальтын соронз үйлдвэрлэхээр төлөвлөжээ.

Үйлдвэр жилд 1,000 гаруй тонн соронз үйлдвэрлэх хүчин чадалтай байхаар тооцсон нь Өмнөд Солонгосын дотоодын 6,000 орчим тонн хэрэгцээний 17 хувьтай тэнцэх дүн юм.

Хятад улс байнгын соронзны дэлхийн үйлдвэрлэлийн 94 хувийг бүрдүүлж байна

Газрын ховор элемент нь цахилгаан автомашины хөдөлгүүр, үйлдвэрлэлийн робот, салхин цахилгаан станц, нисэх онгоц болон батлан хамгаалах тоног төхөөрөмжид ашигладаг өндөр хүчин чадалтай байнгын соронз үйлдвэрлэхэд чухал үүрэгтэй.

Хятад улс эдгээр түүхий эдийн олборлолтоос гадна боловсруулалт, эцсийн бүтээгдэхүүний үйлдвэрлэлд давамгай байр суурь эзэлдэг. Олон улсын эрчим хүчний агентлагийн (IEA) мэдээлснээр 2024 онд Хятад улс соронз үйлдвэрлэхэд ашигладаг газрын ховор элементийн дэлхийн олборлолтын 60 хувь, боловсруулалтын 91 хувь, байнгын соронзны үйлдвэрлэлийн 94 хувийг бүрдүүлжээ.

Энэ төвлөрөл нь бусад орны автомашин, робот техник, батлан хамгаалах салбарын үйлдвэрлэгчдийг Хятадын боловсруулсан түүхий эд болон бэлэн соронзны нийлүүлэлтээс өндөр хамааралтай болгожээ. Ийм нөхцөлд БНСУ-ын шинэ хөрөнгө оруулалт нь зөвхөн дотоодын үйлдвэрлэлийг нэмэгдүүлэхээс гадна стратегийн ач холбогдолтой эд ангийн нийлүүлэлтийг төрөлжүүлэх зорилготой юм.

Хятадын экспортын хязгаарлалт автомашины үйлдвэрлэлд хүндрэл учруулжээ Хятад улс 2025 оны дөрөвдүгээр сард долоон төрлийн хүнд газрын ховор элемент болон тэдгээртэй холбоотой хайлш, металл, соронзны экспортод тусгай зөвшөөрлийн шаардлага тогтоосон.

Улмаар дөрөв, тавдугаар сард холбогдох бүтээгдэхүүний экспорт огцом буурч, АНУ, Европын зарим автомашин үйлдвэрлэгч соронзны нийлүүлэлтийн хомсдолд оржээ. Олон улсын эрчим хүчний агентлагийн мэдээлснээр зарим үйлдвэр хүчин чадлын ашиглалтаа бууруулж, үйлдвэрлэлээ түр зогсооход хүрсэн байна.

Үүний дараа Хятад улс 2025 оны аравдугаар сард экспортын хяналтыг өргөжүүлж, нэмэлт таван газрын ховор элемент, боловсруулах тоног төхөөрөмж болон технологийг хамруулах шийдвэр зарлажээ. Мөн Хятадын гаралтай материал, технологи ашиглан бусад улсад үйлдвэрлэсэн зарим бүтээгдэхүүнд экспортын зөвшөөрөл шаардах зохицуулалт тусгасан байна.

Гэхдээ АНУ, Хятадын худалдааны хэлэлцээний дараа Бээжин аравдугаар сард зарласан өргөтгөсөн хязгаарлалтын хэрэгжилтийг 2026 оны арваннэгдүгээр сарын 10 хүртэл түдгэлзүүлсэн. Харин 2025 оны дөрөвдүгээр сард нэвтрүүлсэн экспортын зөвшөөрлийн үндсэн шаардлагууд хэвээр үлджээ.

Ийнхүү өргөтгөсөн арга хэмжээг түр түдгэлзүүлсэн ч нийлүүлэлтийн эрсдэл бүрэн арилаагүй байна. “Reuters” агентлагийн есдүгээр сарын мэдээллээр Хятадын зарим нийлүүлэгч АНУ-ын компаниудад газрын ховор элемент нийлүүлэхээс татгалзсан тохиолдол гарчээ.

Австрали, Вьетнам, АНУ-ыг холбосон үйлдвэрлэлийн сүлжээ байгуулна

“LS Cable & System” компани газрын ховор элементийн түүхий эдийг Австралийн “Lynas” компаниас авч, Вьетнам дахь “LS Eco Energy”-ийн үйлдвэрлэсэн металлыг ашиглан АНУ болон БНСУ-д байнгын соронз үйлдвэрлэхээр төлөвлөжээ.

Ингэснээр газрын ховор элементийн түүхий эдийн нийлүүлэлт, металл боловсруулах болон эцсийн бүтээгдэхүүн үйлдвэрлэх үе шатыг Хятадаас гаднах улсуудад холбох юм.

Гэхдээ шинэ үйлдвэр байгуулах нь Хятадаас хараат байдлыг шууд бууруулна гэсэн үг биш. Газрын ховор элементийн боловсруулалт, металл үйлдвэрлэл, соронз үйлдвэрлэх технологи зэрэг үе шат бүрд шаардлагатай хүчин чадлыг бүрдүүлэх нь чухал хэвээр байна.

Олон улсын эрчим хүчний агентлагийн тооцоолсноор Хятадаас гаднах орнуудын соронз үйлдвэрлэхэд ашигладаг газрын ховор элементийн эрэлт 2035 он гэхэд 50 хувиар өсөх төлөвтэй байна. Харин одоо ажиллаж буй болон зарлагдсан төслүүдийн төлөвлөсөн хүчин чадал уг эрэлтийг бүрэн хангахад хүрэлцэхгүй гэж тус байгууллага үзжээ.