Казахстаны хил дээр ачаа тээвэр 20 хүртэл хоног саатаж байгаа тул ОХУ-ын импортлогчид өөр маршрут хайхад хүрчээ

Казахстанаар дамжин ОХУ, Беларусийг чиглэсэн ачаа тээврийн саатал нэмэгдэж, импортлогчид нийлүүлэлтийн өөр маршрут эрэлхийлж эхэлжээ. Өмнө нь 20 орчим хоног үргэлжилдэг байсан тээвэрлэлт одоо зөвхөн Казахстаны хил дээр дунджаар 20 хоног хүлээгдэх болсон байна.

Хил дээрх гаалийн шалгалт, нэмэлт хяналт нь хүргэлтийн хугацааг уртасгаж, ялангуяа бага хэмжээний бараа импортолдог жижиг аж ахуйн нэгжүүдийн үйл ажиллагаанд хүндрэл учруулж байгаа аж.

Электрон бараа, автомашины сэлбэгийн шалгалтыг чангатгажээ

Казахстаны гаалийн байгууллага өнгөрсөн зунаас БНХАУ болон Киргизстантай хиллэдэг боомтуудад шалгалтаа нарийвчлах болж, электрон бараа, машин механизм, автомашины эд анги, дрон болон гаалийн мэдүүлэгт зах зээлийн үнээс хэт доогуур үнэлсэн барааг нэмэлт хяналтад хамруулах болжээ.

Ингэснээр эдгээр төрлийн бараа хилээр нэвтрэхээс өмнө олон шатны шалгалтад орж, тээврийн хэрэгслийн хүлээлгийн хугацаа нэмэгдсэн байна.

Мөн Казахстаны Тээврийн яам аравдугаар сарын 30-нд том оврын болон хүнд даацын тээврийн хэрэгслийн хяналтыг чангатгаснаа мэдэгджээ. Үүний дараа ОХУ, Беларусийг чиглэсэн ачааны автомашинуудыг нэмэлт жин хэмжилтэд хамруулах болсон байна.

Эдгээр арга хэмжээ нь хилээр нэвтрэх хугацааг уртасгахаас гадна тээвэрлэгчдийн хүргэлтийн хуваарь, логистикийн төлөвлөлтөд нөлөөлж байгаа аж.

Казахстанаар дамжих тээврийн зардал 12–13 мянган ам.долларт хүрчээ

Аравдугаар сарын байдлаар Казахстанаар дамжин өнгөрөх нэг ачааны автомашины тээврийн зардал 12–13 мянган ам.доллар болсон нь ОХУ руу шууд тээвэрлэх хувилбараас 10–15 хувиар хямд байжээ.

Гэвч тээврийн үнэ харьцангуй бага байгаа нь импортлогчдын хувьд гол давуу тал байхаа больж, хүргэлтийн хугацааны тодорхойгүй байдал шийдвэр гаргалтад нь илүү их нөлөөлөх болсон байна.

Хил дээр удаан хүлээх нь агуулахын нөөц тасалдах, бараа нийлүүлэх гэрээний хугацаа алдагдах, тээврийн нэмэлт зардал үүсэх эрсдэлийг нэмэгдүүлдэг.

Ялангуяа бага хэмжээний бараа захиалдаг жижиг импортлогчдын хувьд нэг удаагийн хүргэлт саатахад дараагийн захиалга болон борлуулалтын төлөвлөгөөг өөрчлөх шаардлага гарч байгаа аж.

Монгол болон Алс Дорнодын чиглэл гол хувилбар болж байна

Казахстаны хил дээрх сааталтай холбоотойгоор логистикийн компаниуд ОХУ руу шууд тээвэрлэхээс гадна Монгол болон Алс Дорнодоор дамжих маршрутуудыг санал болгож эхэлжээ.

Эдгээр хувилбар нь Казахстаны хил дээрх хүлээлтээс зайлсхийх боломж олгож болох ч нийт тээврийн зай, боомтын хүчин чадал, гаалийн бүрдүүлэлт болон нэмэлт зардлаас хамааран үр ашиг нь харилцан адилгүй байна.

Автомашины сэлбэгийн худалдаа эрхлэгч нэгэн сүүлийн хоёр сарын тээвэрлэлтийг “аз сорьсон явдал” хэмээн тодорхойлсон нь хүргэлтийн хугацааг урьдчилан тооцоолоход хүндрэлтэй болсныг илэрхийлэл гэж болох юм.