БНСУ-ын Ерөнхийлөгч тэргүүтэй 168 хүний паспортын мэдээлэл таван сар орчим ил байжээ

БНСУ-ын Ерөнхийлөгч Ли Жэ Мёны иргэний үнэмлэхний мэдээлэл таван сар орчим хугацаанд цахим орчинд нийтэд нээлттэй байсан нь ил болжээ.

Тодруулбал, Ерөнхийлөгчийн зургаадугаар сард хийсэн Европын айлчлалын үеэр тусгай үүргийн онгоцоор зорчсон 168 хүний нэр, харьяалал, албан тушаал, төрсөн он сар өдөр болон паспортын дугаар зэрэг хувийн мэдээлэл задарсан байна.

“Ёнхап” агентлагийн мэдээлснээр зорчигчдын мэдээлэл бүхий файлыг зургаадугаар сарын 2-нд хортой код шалгах зориулалттай цахим платформд байршуулсан нь таван сар орчим хугацаанд хэн ч үзэж болох нөхцөл бүрдүүлжээ.

Мэдээлэл задрахад кибер халдлага бус, хүн нөлөөлөв үү?

Албаныхны урьдчилсан мэдээллээр уг хэрэг гаднын кибер халдлагын улмаас бус, айлчлалтай холбоотой мэдээллийг боловсруулах, дамжуулах явцад гарсан алдаанаас үүдсэн байж болзошгүй.

БНСУ-ын хэвлэлүүдийн мэдээлснээр файлыг Бельгийн талд дамжуулахтай холбоотой үйл явцыг мөн шалгаж байгаа аж.

Гэхдээ платформд хэн байршуулсан, ямар нөхцөлд нийтэд нээлттэй болсон, тухайн мэдээлэлд гуравдагч этгээд нэвтэрсэн эсэхийг эцэслэн тогтоогоогүй байна.

Уг хэрэгтэй холбогдуулан БНСУ-ын Үндэсний цагдаагийн газар мөрдөн шалгалт эхлүүлжээ.

Шалгалтаар мэдээлэл задарсан шалтгаан, холбогдох албан тушаалтнуудын хариуцлага болон мэдээллийн аюулгүй байдлын дотоод хяналт хэрхэн хэрэгжсэнийг тогтоох юм.

Ерөнхийлөгч болон тэргүүн хатагтайн паспортыг шинэчилнэ

Тус улсын Гадаад хэргийн яам Ерөнхийлөгч Ли Жэ Мён болон тэргүүн хатагтай Ким Хэ Гён нарт шинэ паспорт олгохоор болжээ.

Мөн хувийн мэдээлэл нь задарсан бусад албан хаагч, сэтгүүлчдийн паспортыг шинэчлэх ажиллагаа эхэлсэн байна.

Паспортын дугаар, төрсөн он сар өдөр болон нэр зэрэг мэдээлэл нэг дор ил болох нь хувийн мэдээллийг хууль бусаар ашиглах, бусдын нэрээр залилан хийх зэрэг эрсдэлийг нэмэгдүүлдэг.

Тиймээс паспорт шинэчлэх нь задарсан мэдээллийг цаашид ашиглах эрсдэлийг бууруулах хамгаалалтын арга хэмжээ болж байна.

Ерөнхийлөгчийн гадаад айлчлалын аюулгүй байдлын журмыг эргэн хянана

Мэдээлэл задарснаас шалтгаалан, БНСУ-ын Ерөнхийлөгчийн тамгын газар гадаад айлчлалын үеийн мэдээллийн аюулгүй байдлын журмыг дахин хянахаар болжээ.

Төрийн өндөр түвшний айлчлалд оролцогчдын хувийн мэдээллийг бүртгэх, хадгалах, байгууллагуудын хооронд дамжуулах болон цахим системд байршуулах үйл ажиллагаанд тавих хяналтыг сайжруулах шаардлага үүсээд байна.

Ялангуяа Ерөнхийлөгч болон түүний бараа бологч хүмүүсийн паспортын мэдээлэл таван сар орчим хугацаанд нийтэд нээлттэй байсан нь мэдээллийн аюулгүй байдлын алдааг илрүүлэх, шуурхай арга хэмжээ авах тогтолцооны үр нөлөөнд анхаарал хандуулж байна.

Гэхдээ энэ хугацаанд мэдээллийг хууль бусаар ашигласан эсэх, хэдэн хүн уг файлд хандсан талаар баталгаатай мэдээлэл одоогоор гараагүй байна.