АНУ-д эрүүл мэндийн хуримтлалаа ашиглан тэтгэврийн хуримтлал үүсгэх боломжтой

АНУ-д эрүүл мэндийн даатгалаа сонгох ээлжит хугацаа эхэлж буйтай холбоотойгоор эрүүл мэндийн хуримтлалын дансаа тэтгэврийн хуримтлал болгон ашиглах боломжийг санхүүгийн зөвлөхүүд онцолж байна. Иргэд уг дансанд мөнгө хуримтлуулж, эмчилгээний төлбөрөө төлөхөөс гадна хувьцаа, бонд зэрэгт хөрөнгө оруулан олон жилийн турш өсгөх боломжтой.

Эрүүл мэндийн хуримтлалын данс яагаад татварын давуу талтай вэ? Энэ дансны гол давуу тал нь татварын хөнгөлөлт юм. Тухайлбал, дансанд оруулсан мөнгөнд холбооны орлогын албан татвар төлөхгүй, хөрөнгө оруулалтаас олсон ашгаас татвар суутгахгүй. Мөн хуримтлалаа шаардлага хангасан эмчилгээ, эрүүл мэндийн зардалд ашиглахад татвар ногдуулахгүй. Иймээс санхүүгийн зөвлөхүүд эрүүл мэндийн хуримтлалын дансыг тэтгэвэрт гарахдаа ашиглаж болох хуримтлалын үр ашигтай хэрэгсэл гэж үздэг. Гэвч энэ боломжийг ашигладаг иргэд харьцангуй цөөн байна. Судалгааны “Devenir” компанийн мэдээлснээр 2026 оны эхний хагасын байдлаар АНУ дахь нийт эрүүл мэндийн хуримтлалын дансны ердөө 11 хувьд нь хөрөнгө оруулалт хийсэн байжээ. Ердийн эрүүл мэндийн зардлын зарим хуримтлалын данснаас ялгаатай нь эрүүл мэндийн хуримтлалын дансанд үлдсэн мөнгийг тухайн жилдээ заавал зарцуулах шаардлагагүй. Ашиглаагүй мөнгө дараагийн жилд шилжих бөгөөд данс эзэмшигч ажлаа сольсон ч хуримтлалаа хадгалж үлдэнэ. Тиймээс ойрын хугацаанд эмчилгээний зардалд ашиглах шаардлагагүй мөнгийг олон жилийн турш хөрөнгө оруулалтад байршуулах боломжтой. АНУ-ын хөрөнгө оруулалтын “Fidelity Investments” компанийн тооцоолсноор 2026 онд 65 насандаа тэтгэвэрт гарч буй нэг хүн амьдралынхаа үлдсэн хугацаанд эрүүл мэнд, эмчилгээний зардалд дунджаар 185,500 ам.доллар зарцуулах төлөвтэй байна. Ийм зардлыг санхүүжүүлэхэд эрүүл мэндийн хуримтлал тус болох боломжтой. Түүнчлэн уг дансны мөнгийг өмнө нь хувиасаа төлсөн эмчилгээний зардлаа нөхөхөд ашиглаж болдог. Тухайлбал, 50 настайдаа эмчилгээний төлбөрт 5,000 ам.доллар зарцуулсан хүн холбогдох баримтаа хадгалсан бол 65 насандаа HSA-аасаа уг мөнгийг татваргүйгээр нөхөн авч болно. Ингэснээр хуримтлалаа шууд зарцуулахын оронд илүү удаан хугацаанд өсгөх боломж бүрдэнэ.

2027 онд уг дансанд 9,000 хүртэлх ам.доллар хуримтлуулах боломжтой 2027 онд эрүүл мэндийн хуримтлалын дансанд оруулах мөнгөний жилийн дээд хэмжээ хувь хүний даатгалтай бол 4,500 ам.доллар, гэр бүлийн даатгалтай бол 9,000 ам.доллар байна. Харин 55 болон түүнээс дээш насныхан нэмэлт 1,000 ам.доллар хуримтлуулах боломжтой. Гэхдээ дансанд мөнгө хуримтлуулахын тулд тодорхой шаардлага хангасан, өндөр суутгалтай эрүүл мэндийн даатгалтай байх ёстой. Ийм даатгалын сарын хураамж харьцангуй бага байж болох ч эмчилгээний зардлын эхний хэсгийг даатгуулагч өөрөө төлдөг. Тухайлбал, 2027 онд энэ төрлийн даатгалын суутгалын доод хэмжээ хувь хүнд 1,750 ам.доллар, гэр бүлд 3,500 ам.доллар байна. Мөн дансанд хуримтлуулсан мөнгийг 65 нас хүрэхээс өмнө эрүүл мэндийн бус зориулалтаар зарцуулбал ерөнхийдөө орлогын албан татвараас гадна 20 хувийн нэмэлт татвар төлнө. Харин 65 наснаас хойш нэмэлт татвар ногдуулахгүй ч эрүүл мэндийн бус зориулалтаар ашигласан мөнгөнд орлогын албан татвар төлөх шаардлагатай аж. Иймээс санхүүгийн зөвлөхүүд зөвхөн хөрөнгө оруулалтын давуу талыг нь харж эрүүл мэндийн хуримтлалын хамрагдахыг зөвлөхгүй байна. Иргэд эхлээд өөрийн эрүүл мэндийн хэрэгцээ, даатгалын төлбөр болон хувиасаа гаргах зардлаа тооцох шаардлагатай. Харин өдөр тутмын эмчилгээний зардлаа өөрөө төлөх боломжтой хүмүүсийн хувьд энэ данс нь тэтгэвэрт гарах хүртлээ мөнгөө өсгөх нэмэлт боломж болох аж.