Нийслэлийн агаарын бохирдол зарим байршилд стандартаас 2.4 дахин их байна

Өнөө өглөө 04:00 цагийн байдлаар Баруун дөрвөн зам орчимд PM10 нарийн ширхэглэгт тоосонцрын агууламж 371 мкг/м³, азотын давхар исэл 66 мкг/м³ байсан бол 05:00 цагийн хэмжилтээр Нэгдүгээр хороолол орчимд PM10 тоосонцрын агууламж 122 мкг/м³, хүхэрлэг хий 55 мкг/м³, азотын давхар исэл 75 мкг/м³ байжээ.

Тэгвэл нийслэлийн хэд хэдэн байршилд агаар бохирдуулагч бодисын агууламж арваннэгдүгээр сарын 3-ны хэмжилтээр Монгол Улсын агаарын чанарын стандартаас 1.6–2.4 дахин их байжээ.

Агаарын чанарын хяналт-шинжилгээний дүнгээр PM10 тоосонцрын агууламж 52–242 мкг/м³ хооронд хэлбэлзэж, хамгийн өндөр үзүүлэлт Хайлааст орчимд бүртгэгдсэн байна.

Харин хүний уушгины гүнд нэвтрэх чадвартай нарийн ширхэглэг PM2.5 тоосонцрын агууламж 10–75 мкг/м³ хүрч, III, IV хорооллын эцэст стандартаас хоёр дахин давжээ.

Азотын давхар ислийн агууламж 13–82 мкг/м³ хүрч, Зайсан орчимд стандартаас 1.6 дахин их байсан бол хүхэрлэг хийн агууламж 8–80 мкг/м³ хүрч, III, IV хорооллын эцэст мөн 1.6 дахин их байв.

Нүүрстөрөгчийн дутуу ислийн агууламж 524–4,280 мкг/м³ хооронд хэмжигдэж, хамгийн өндөр утга III, IV хорооллын эцэст бүртгэгджээ.

Нарийн ширхэглэг тоосонцор эрүүл мэндэд эрсдэл учруулдаг

PM2.5 тоосонцор нь 2.5 микрометрээс бага хэмжээтэй тул амьсгалын замаар уушгины гүнд нэвтэрч, удаан хугацаанд өндөр агууламжтай орчинд байснаар амьсгалын зам болон зүрх, судасны өвчний эрсдэлийг нэмэгдүүлдэг.

Харин PM10 тоосонцор нь амьсгалын замыг цочроож, астма болон амьсгалын замын архаг өвчтэй хүмүүст ихээхэн нөлөөлөх эрсдэлтэй.

Иймээс агаарын бохирдол өндөр үед бага насны хүүхэд, ахмад настан, жирэмсэн эмэгтэйчүүд болон зүрх, уушгины архаг өвчтэй иргэд гадаа удаан байх, эрчимтэй дасгал хөдөлгөөн хийхээс зайлсхийхийг зөвлөдөг.

Агаарын чанарыг цаг тутам хянах боломжтой

Улаанбаатар хотын агаарын бохирдол байршил болон цаг агаарын нөхцөлөөс хамааран өдрийн турш өөрчлөгддөг. Тиймээс нэг цэгийн өндөр үзүүлэлтээр нийслэлийн бүх дүүргийн нөхцөл байдлыг тодорхойлох боломжгүй.

Иргэд агаарын чанарын хэмжилтийн мэдээллийг “Агаарын чанарын хяналтын систем” болон Цаг уур, орчны шинжилгээний байгууллагын цахим хуудсаар шалгах боломжтой.