Д.Трамп америкчууд өөрөөс нь залхвал Израил руу нүүж, Ерөнхий сайд нь болно хэмээв

АНУ-ын Ерөнхийлөгч Дональд Трамп Конгрессын мягмар гарагт завсрын сонгуулийн санал хураалт үргэлжилж байх үеэр “Fox & Friends” нэвтрүүлэгт утсаар оролцохдоо Израил дахь нэр хүндийнхээ талаар ярьж, тус улсын Ерөнхий сайд болох боломжтой хэмээн хошигножээ.

Тэрбээр энэ талаар “Хэрэв Америкчууд хэзээ нэгэн цагт надаас залхвал би Израил руу нүүж, Ерөнхий сайд нь болно” хэмээсэн байна. Тэрбээр Израилд өөрийг нь дэмжиж буй иргэдийн хувь 99 хувьд хүрсэн гэж мэдэгдэж, үүнийг түүхэн дэх хамгийн өндөр үзүүлэлт хэмээн тодорхойлсон байна.

Трамп өмнө нь буюу 2026 оны тавдугаар сарын 20-нд мөн Израилын Ерөнхий сайдын сонгуульд өрсөлдөж болох тухай ярьж байсан. Тухайн үед ч Израил дахь нэр хүндээ 99 хувьтай гэж мэдэгдсэн боловч санал асуулгын эх сурвалжаа тодорхойлоогүй аж.

Трамп Израилд үзүүлэх АНУ-ын тусламжийг зогсоох талаар Израилын Ерөнхий сайд Биньямин Нетаньяхутай хэдэн сарын өмнө тохиролцсон гэж мэдэгджээ. Гэвч хоёр улсын хооронд байгуулсан одоогийн гэрээний дагуу АНУ 2028 оныг дуустал жил бүр 3.8 тэрбум ам.долларын цэргийн тусламж үзүүлэхээр байгаа бөгөөд санхүүжилтийг хугацаанаас нь өмнө хэрхэн зогсоох нь тодорхойгүй хэвээр байна.