Японд хүмүүс хоорондоо танилцаж, хууч хөөрөх зорилготой “залхуу гүйлт”-ийн клубууд дэлгэрч байна

Японы нийслэл Токио хотноо спортын амжилт гаргахын оронд шинэ хүмүүстэй танилцаж, хамтдаа цагийг өнгөрүүлэх зорилготой “залхуу гүйлт”-ийн клубүүд олширч байна. Эдгээр клубүүдэд оролцогчид заавал хурдан гүйх, марафонд бэлтгэх шаардлагагүй бөгөөд өөрийн боломжид тохирсон хэмнэлээр гүйсний дараа кофе ууж, хоорондоо ярилцдаг байна. Тухайлбал, Токиогийн Накамэгүро дүүрэгт үйл ажиллагаа явуулдаг “Meguro River Lazy Runners” клубийг Алис Грегг гурван жилийн өмнө байгуулжээ. Тэрбээр өмнө нь хотын бусад гүйлтийн клубүүдэд оролцож үзсэн ч ихэнх нь эрчимтэй бэлтгэл, спортын амжилтад төвлөрдөг байсан тул илүү чөлөөтэй, нөхөрсөг орчин бүрдүүлэхээр шийдсэн аж. Клубийн оролцогчид гүйлт эхлэхээс өмнө тойрог болон зогсож, бие халаахын зэрэгцээ бие биетэйгээ танилцдаг. Тэдний яриа спортын үзүүлэлтээс илүүтэй гүйсний дараа юу уух дуртай зэрэг өдөр тутмын энгийн сэдвээс эхэлдэг байна.

Гүйлтийн клубүүд шинэ танилын хүрээлэл бий болгож байна Токиод ийм төрлийн клубүүд зөвхөн нэг газарт төвлөрөхгүй, хотын өөр өөр дүүрэгт үйл ажиллагаа явуулж эхэлжээ. Тухайлбал, энэ онд зохион байгуулагдсан “3RUNNING CLUB” хоёр долоо хоног тутмын бямба гарагт оролцогчдоо кофе шопт цуглуулж, хамтдаа 30 орчим минут гүйсний дараа буцаж ирэн ярилцдаг байна. Тус клубийн оролцогчдын дунд мэдээллийн технологийн инженер, нислэгийн үйлчлэгч, гэрэл зурагчин, хувийн дасгалжуулагч зэрэг өөр өөр салбарын хүмүүс багтдаг. Ингэснээр өдөр тутмын ажил, амьдралын хүрээнд танилцах боломж багатай хүмүүс гүйлтээр дамжуулан харилцаа холбоогоо өргөжүүлж байгаа аж. Тус клубийн 25 настай нэг оролцогч цар тахлын үеэр их сургуулийн хичээлээ цахимаар үзэж, оюутны нийгмийн амьдралд оролцох боломж хязгаарлагдсанаа ярьжээ. Харин гүйлтийн клубт нэгдсэнээр ажлын хүрээллээс гадуур шинэ хүмүүстэй танилцах боломжтой болсон байна.

Гүйгчдийн 35.8 хувь нь ямар нэг хэлбэрээр клубийн үйл ажиллагаанд оролцдог Японы гүйлтийн төрөлжсөн “RUNNET” платформын есдүгээр сард нийтэлсэн судалгаанд хамрагдсан гүйгчдийн 35.8 хувь нь гүйлтийн клуб, хамтын үйл ажиллагаанд ямар нэг хэлбэрээр оролцдог гэж хариулжээ. Тодруулбал, 18.7 хувь нь тодорхой нэг клубт харьяалагддаг, 9.5 хувь нь сонирхсон арга хэмжээндээ нэг удаа оролцдог бол 7.6 хувь нь хэд хэдэн клубийн үйл ажиллагаанд хамрагддаг байна. Харин 64.2 хувь нь ямар нэг клубт харьяалагддаггүй гэжээ. Мөн Токиод зургадугаар сард байгуулагдсан “TOKYO RUN CLUB” мөн долоо хоногт 3–4 удаа, 5–10 километрийн хамтын гүйлт зохион байгуулж, оролцогчдоос төлбөр авахгүйгээр үйл ажиллагаа явуулж байна. Гишүүнчлэл болон урьдчилсан бүртгэл шаардахгүй нь анхлан гүйж буй хүмүүс, гадаадын жуулчдад оролцоход хялбар нөхцөл бүрдүүлжээ. Ийнхүү Токиод гүйлт зөвхөн биеийн тамирын дасгал байхаа больж, хүмүүсийг уулзуулж, шинэ танилын хүрээлэл бий болгох нэг хэлбэр болж байна.