Цалин, тэтгэмжийг зэрэг нэмэгдүүллээ: Өрхийн орлого өсөх ч инфляцыг өдөөх үү?

Засгийн газар эрүүл мэнд, шинжлэх ухаан, соёл, спорт болон бусад салбарын 52 мянга орчим төрийн үйлчилгээний албан хаагчийн үндсэн цалинг 2025 оны түвшинтэй харьцуулахад 50 хувиар нэмэгдүүлэх шийдвэр гаргасан.

Шинэ зохицуулалтыг энэ сарын 1-нээс хэрэгжүүлж, цалингийн өсөлтөд 170.1 тэрбум төгрөг зарцуулахаар болжээ.

Энэ нь төрийн үйлчилгээний салбарт ажиллаж буй албан хаагчдын орлогыг нэмэгдүүлэхэд чиглэж байгаа ч төсвийн цалингийн зардлыг өсгөх нөлөөтэй.

Эрүүл мэндийн салбарын 28 мянга гаруй ажилтан хамрагдана

Цалингийн нэмэгдэлд хамрагдах албан хаагчдын хамгийн их хувийг эрүүл мэндийн салбарын ажилтнууд бүрдүүлж байна.

Эрүүл мэндийн салбар-28,142 албан хаагч

Соёл, урлаг, спортын салбар-5,707

Шинжлэх ухааны салбар-1,610

Бусад салбар-16,395

Нийгмийн халамжийн тэтгэвэр, асаргааны тэтгэмжийг шинэчлэн тогтоожээ

Цалингийн зохицуулалттай зэрэгцэн Засгийн газар нийгмийн халамжийн зарим тэтгэвэр, тэтгэмжийн хэмжээг шинэчлэн тогтоосон.

Шинэ зохицуулалтаар нийгмийн халамжийн тэтгэврийг сард 600 мянган төгрөг, асаргааны тэтгэмжийг 370 мянган төгрөг, хүнд хэлбэрийн хөгжлийн бэрхшээлтэй хүүхэд асарч буй иргэний тэтгэмжийг 524 мянган төгрөгөөр тогтоожээ.

Халамжийн дэмжлэгийн хэмжээ өсөх нь хамрагдах иргэдийн өрхийн орлогыг нэмэгдүүлж, хүнс, эмчилгээ болон өдөр тутмын зайлшгүй хэрэглээний зардлыг санхүүжүүлэхэд дэмжлэг үзүүлнэ гэж албаныхан тайлбарлажээ.

Цалингийн өсөлт төсөв, инфляцид хэрхэн нөлөөлөх вэ?

Төрийн үйлчилгээний ажилтнуудын үндсэн цалинг нэмэгдүүлэх нь өрхийн орлогыг дэмжихээс гадна эрүүл мэнд, соёл, шинжлэх ухаан зэрэг салбарын ажиллах хүчний тогтвортой байдалд эергээр нөлөөлөх боломж юм.

Гэхдээ цалин, тэтгэмжийн өсөлт нь төсвийн зарлагыг нэмэгдүүлэх тул санхүүжилтийн эх үүсвэр, цаашдын тогтвортой байдал анхаарлын төвд байна.

Мөн өрхийн орлого өссөнөөр бараа, үйлчилгээний хэрэглээ нэмэгдэх боломжтой. Хэрэв нийлүүлэлт нэмэгдсэн эрэлтийг хангаж чадахгүй бол инфляц нэмэгдэх эрсдэлтэй.

Нотариатын үйлчилгээг цахимаар үзүүлэх зохицуулалт хэлэлцжээ Засгийн газрын түвшинд Нотариатын тухай хуулийн төслийг УИХ-д өргөн мэдүүлэх асуудлыг мөн танилцуулсан байна.

Хуулийн төсөлд цахим орчинд зайнаас нотариатаар баталгаажуулах зохицуулалтыг тусгажээ.

Мөн зорилтот бүлгийн иргэдэд нотариатын үйлчилгээний төлбөрийн хөнгөлөлт, чөлөөлөлт үзүүлэх боломжийг бүрдүүлэхээр санал боловсруулсан байна.