Туршилтын үеэр мотор болон аюулгүйн тоормосыг зориуд ажиллуулах тул кабин хүчтэй савлаж болзошгүй

Дүүжин замын тээврийн системийн аюулгүй, найдвартай ажиллагааг шалгах туршилт кабиныг 750 кг ачаатай ажиллуулж, тоормос болон ослын үеийн хамгаалалтын системүүдийг шалгахад чиглэж байна.

Туршилтын үеэр системийн моторын тоормос болон аюулгүйн тоормосыг зориудаар ажиллуулах тул кабинууд хүчтэй савлах, гэнэт зогсох зэрэг хөдөлгөөн ажиглагдаж магадгүйг албаныхан онцоллоо.

Энэ нь тоног төхөөрөмжийн эвдрэл, осол гарсан гэсэн үг биш, харин аюулгүй ажиллагааны төлөвлөгөөт туршилтын нэг хэсэг болохыг “Пома групп”-ийн барилгын инженер Жуан Муниер тайлбарлажээ. Тэрбээр дүүжин тээврийн системийн талаар олон нийтийн сүлжээнд гарч буй мэдээллээс иргэд осол, эвдрэл гарах вий гэсэн болгоомжлолтой байгааг анзаарснаа ч онцолжээ.

Өвлийн улиралд ган татлагад мөс тогтвол яах вэ? Монголын эрс тэс уур амьсгалтай холбоотойгоор дүүжин тээврийн ган татлагад цас, мөс тогтох эсэх нь иргэдийн анхаарал татаж буй асуудлын нэг юм.

Энэ талаар Жуан Муниер ган татлага байнгын хөдөлгөөнтэй байдаг тул нэг цэг дээр зузаан мөс тогтох эрсдэл хязгаарлагдмал гэж үзэж байгаагаа илэрхийлжээ.

Түүнчлэн ган татлага буудлын дамраар дамжин хөдөлж байх үед үрэлтийн улмаас тодорхой хэмжээний дулаан ялгардаг нь мөс тогтохоос сэргийлэхэд нөлөөлдөг гэжээ.

Цахилгаан тасарвал нөөц генератор ажиллана

Дүүжин тээврийн системийн цахилгаан хангамж тасарсан тохиолдолд зорчигчдыг хэрхэн буулгах вэ?

Жуан Муниерийн мэдээлснээр зорчих үеэр цахилгаан тасарвал нөөц генератор ажиллаж, кабинуудыг буудалд хүргэхийг онцолжээ.

Өөрөөр хэлбэл, үндсэн цахилгаан хангамж тасарсан үед системийн нөөц эх үүсвэрийг ашиглан зорчигчдыг буудалд хүргэх аж.

Мөн бүх кабинд радио холбоо суурилуулсан бөгөөд шаардлагатай тохиолдолд зорчигчдод нөхцөл байдлын талаар мэдээлэл өгч, зааварчилгаа хүргэх боломжтой.

Туршилтын дараа ашиглалтад оруулах дараагийн шат үргэлжилнэ

Дүүжин замын тээврийн системийн аюулгүй ажиллагааг шалгах туршилтууд нь зорчигч тээвэрлэж эхлэхээс өмнөх чухал үе шат юм.

Тухайлбал, кабины даац, тоормосны ажиллагаа, цахилгаан хангамжийн нөөц эх үүсвэр болон холбооны системийг шалгаж байгаа нь ашиглалтын үеийн болзошгүй эрсдэлийг урьдчилан үнэлэх зорилготой.

“Пома групп”-ийн мэдээлснээр 750 кг ачаатай кабины туршилтыг амжилттай дуусгаснаар төслийн ажил дуусах шатандаа орох юм.

Ашиглалтад оруулахын өмнө холбогдох техникийн шалгалт, аюулгүй ажиллагааны шаардлагыг бүрэн хангасан эсэхийг баталгаажуулах аж.