БНСУ-ын олон ангит киноны амжилтын цаана хөдөлмөрийн мөлжлөг нуугдаж байна уу?

БНСУ-ын олон ангит кинонууд дэлхий нийтийн анхаарлыг татаж, соёлын экспортын чухал хэсэг болсон ч бүтээлийн ард ажилладаг зураг авалтын баг урт цагаар ажиллах, хөдөлмөрийн баталгаагүй гэрээ байгуулах, нийгмийн даатгалын хамгаалалтаас гадуур үлдэх зэрэг асуудалтай тулгарсаар байна.

Хэвлэл мэдээллийн салбарын ажилтнуудын хөдөлмөрлөх эрхийг хамгаалдаг “Hanbit Media Labor Rights Center” байгууллагаас аравдугаар сарын 24-нд танилцуулсан судалгаагаар телевизийн олон ангит киноны зураг авалтын ажилтнууд долоо хоногт дунджаар 54 цаг 23 минут ажиллажээ.

Хоёр сарын хугацаанд 237 ажилтныг хамруулсан уг судалгааны дүн тус улсын Хөдөлмөрийн хуулиар тогтоосон долоо хоногийн 52 цагийн дээд хязгаараас 2 цаг 23 минутаар өндөр байна.

Мөн судалгаанд бүртгэгдсэн ээлжийн ажлын 24.8 хувь нь 22:00–06:00 цагийн хооронд дууссан бол 31 хувьд нь ажилтнууд дараагийн ээлж эхлэхээс өмнө 11 цаг хүрэхгүй хугацаанд амарсан байна.

Эдгээр үзүүлэлт нь телевизийн олон ангит киноны үйлдвэрлэлд ажлын цаг, амралтын хугацааны зохицуулалт тулгамдсан асуудал хэвээр байгааг харуулав.

Зураг авалт, цацалтыг зэрэг явуулах нь ажлын ачааллыг нэмэгдүүлдэг

БНСУ-ын телевизийн олон ангит киноны үйлдвэрлэл продакшн компани, туслан гүйцэтгэгч болон үйлчилгээ үзүүлэгч олон байгууллагын оролцоонд тулгуурладаг.

Ийм бүтэцтэй учраас зураг авалтын багийнхныг байнгын хөдөлмөрийн гэрээгээр бус, тодорхой төсөлд ажил гүйцэтгэх гэрээгээр ажиллуулах нь түгээмэл аж.

Үйлдвэрлэлийн үүрэг хариуцлага олон байгууллагад хуваагддаг нь ажлын цаг, цалин хөлс, амралтын хугацаанд нэгдсэн стандарт мөрдүүлэхэд хүндрэл учруулдаг байна.

Үүнээс гадна телевизийн цувралын зураг авалт, нэвтрүүлгийг зэрэг явуулдаг үйлдвэрлэлийн арга барил ажлын ачааллыг нэмэгдүүлдэг гэж судлаачид үзэж байна.

АНУ-ын телевизийн салбарт цувралын зураг авалтыг цацалтаас өмнө дуусгах арга барил өргөн хэрэглэгддэг байсан бол БНСУ-ын олон ангит киноны үйлдвэрлэлд зураг авалт үргэлжилж байх үед бэлэн болсон ангиудыг цацах практик түгээмэл.

Сувоны их сургуулийн хэвлэл мэдээлэл, харилцааны профессор Ли Мүн Хэний тайлбарласнаар бүтээл үйлдвэрлэл, цацалтын хугацаа давхцах нь зураг авалтыг богино хугацаанд дуусгах шахалтыг нэмэгдүүлж, ажилтнуудын хөдөлмөрийн нөхцөлийг хүндрүүлдэг аж.

Кино урлагийн салбарт стандарт гэрээ тогтсон ч телевизийн үйлдвэрлэлд хангалтгүй байна

БНСУ 2018 оны долоодугаар сарын 1-нээс долоо хоногийн ажлын цагийг 52-оор хязгаарлах зохицуулалтыг үе шаттай хэрэгжүүлж эхэлсэн.

Улмаар 2021 оны долоодугаар сарын 1-нээс тав болон түүнээс дээш ажилтантай байгууллагуудад уг зохицуулалт үйлчилж эхэлжээ.

Хуулийн дагуу ердийн ажлын цаг долоо хоногт 40, илүү цаг 12 хүртэл байх ерөнхий хязгаарлалттай.

Сөүлд ажилладаг продюсер, кино зохиолч Томас Сугийн үзэж буйгаар уг өөрчлөлт зураг авалтын ажлын цагийг үйлдвэрлэлийн төлөвлөлтөд зайлшгүй тооцох шаардлагатай гэсэн ойлголтыг салбарт төлөвшүүлэхэд нөлөөлсөн байна.

Гэсэн хэдий ч хөдөлмөрийн стандарт гэрээний хэрэглээ телевизийн олон ангит киноны салбарт хангалтгүй хэвээр байгаа аж.

БНСУ-ын дэд профессор Ли Сон Миний тайлбарласнаар төрийн дэмжлэгтэй Кино хөгжүүлэх сангаас хөрөнгө оруулалт авдаг кино төслүүд стандарт хөдөлмөрийн гэрээ ашиглах шаардлагатай байдаг аж.

Түүнчлэн томоохон хөрөнгө оруулагч, түгээгч байгууллагуудын хамтын ажиллагааны үр дүнд кино урлагийн салбарт стандарт гэрээний хэрэглээ харьцангуй тогтжээ.

Харин телевизийн олон ангит киноны үйлдвэрлэлд санхүүжилтийн эх үүсвэр олон, туслан гүйцэтгэгч байгууллагуудын оролцоо өндөр байдаг нь ижил түвшний зохицуулалт хэрэгжүүлэхэд саад болж байна.

Үүний улмаас зарим ажилтан үйлдвэрлэлийн ослын нөхөн төлбөр болон ажил эрхлэлтийн даатгалын хамгаалалтад бүрэн хамрагдаж чадахгүй байгааг Ли Сон Мин анхааруулжээ.

“YouTube” болон богино хэмжээний драмын зах зээл хөдөлмөрийн шинэ эрсдэл үүсгэж байна

Телевизийн уламжлалт сувгуудаас гадна “YouTube”, вэб цуврал болон гар утасны босоо форматад зориулсан богино хэмжээний драмын үйлдвэрлэл өргөжиж байгаа нь хөдөлмөрийн харилцааг зохицуулах асуудлыг улам төвөгтэй болгож байна.

Ялангуяа жижиг продакшнууд жүжигчин, зураг авалтын ажилтнуудыг байнгын гэрээгээр бус, бие даан үйлчилгээ үзүүлэх нөхцөлөөр ажиллуулах нь түгээмэл болжээ.

Зарим тохиолдолд ажилтнуудтай бичгээр гэрээ байгуулахгүйгээр амаар тохиролцох, богино хугацаанд зураг авалт дуусгах, цалин хөлсийг нэг удаагийн тогтмол дүнгээр олгох практик ажиглагдаж байна.

“YouTube”-ийн контент нь уламжлалт телевизийн нэвтрүүлэгтэй ижил эрх зүйн ангилалд хамаардаггүй учраас телевизийн үйлдвэрлэлд зориулсан зарим стандарт, хяналтын механизм шинэ медиа салбарт шууд үйлчлэхгүй байх тохиолдол бий.

Гэхдээ энэ нь цахим платформд зориулсан бүх бүтээл хөдөлмөрийн хууль тогтоомжоос чөлөөлөгдөнө гэсэн үг биш юм. Ажилтны бодит хөдөлмөрийн харилцаа, гэрээний нөхцөлөөс хамааран хуульд заасан хамгаалалт үйлчлэх боломжтой.

Томас Суны хэлснээр хөдөлмөрийн гэрээг тодорхой болгох, ажлын цагийг бүртгэх, эрх зөрчигдсөн тохиолдолд гомдол гаргах бодит механизм бүрдүүлэх нь чухал аж.