Танилц! Өвчтөнүүдэд сэтгэлийн дэм өгдөг олон төрлийн авьяастай одой морь

АНУ-ын Калифорни мужийн Лос-Анжелес хотод “Black Pearl” буюу Хар Сувд нэртэй бяцхан одой морь эмнэлэгт хэвтэн эмчлүүлж буй өвчтөнүүд, тэр дундаа сэтгэлзүйн хүндрэлтэй ахмад дайчдад сэтгэл санааны дэмжлэг үзүүлдэг “мэргэжилтэй”. Тэрбээр “Mini Therapy Horses” сайн үйлсийн байгууллагын бусад найман одой морины хамт эмнэлгүүдээр зочилж, өвчтөнүүдтэй ойроос харилцдаг байна. Тус байгууллагын үүсгэн байгуулагч өмнө нь морин спортын уран жолоодлогын төрлөөр олон жил хичээллэж, тэмцээн уралдаанд оролцож байжээ. Улмаар спортоос зодог тайлсныхаа дараа 2008 онд Калифорни мужийн Солванг хотын “Quicksilver Ranch” аж ахуйгаас зургаан сартай Хар Сувдыг үрчилсэн байна. Анх гэртээ хань болгох зорилгоор авсан одой морь нь ихэд хөдөлгөөниэй, хүмүүстэй ойр байх дуртай бөгөөд аливаа шинэ зүйлийг хурдан сурдаг байжээ. Эзэн нь ч түүнд янз бүрийн үзүүлбэр, хөдөлгөөн зааж эхэлснээр өвчтөнүүдэд хамтдаа туслалцаа үзүүлэх санаа төрсөн аж. Улмаар Хар Сувдын нийтэч зан чанар “Mini Therapy Horses” байгууллагыг байгуулах гол сэдэл болсон байна.

Ахмад дайчид болон эмнэлгийн өвчтөнүүдтэй байнга уулздаг Байгууллагын одой морьд Лос-Анжелес хотын ахмад дайчдын эмнэлгийн хаалттай сэтгэцийн тасагт байнга зочилж, өвчтөнүүдэд урам зориг өгдөг аж. Тэнд гэмтлийн дараах стрессийн эмгэг, тархины гэмтэл, мансууруулах бодисын хамаарал зэрэг хүндрэлтэй өвчтөн эмчлүүлдэг бөгөөд зарим нь орон гэргүй ажээ. Өвчтөнүүд одой морьдыг илж, тэвэрч, тэдэнтэй ойроос харилцах боломжтой. Байгууллагын үүсгэн байгуулагчийн тайлбарласнаар ийм уулзалт нь ахмад дайчдын ганцаардал, бусдаас тусгаарлагдсан мэдрэмжийг багасгахад тусалдаг байна. Түүнчлэн байгууллага бусад эмнэлэгт удаан хугацаагаар хэвтэн эмчлүүлж буй хүүхэд, насанд хүрэгчидтэй уулздаг. Харааны бэрхшээлтэй хүүхдүүдэд одой морьдын биеийг тэмтрүүлж, үсийг нь самнуулах замаар амьтантай харилцах боломж олгодог аж. Хар Сувд мөн тэргэнцэртэй өвчтөний хажууд алхдаг бөгөө өвчтөнүүд жолоог нь барин хамт хөдөлж чаддаг. Гэртээ үлдээсэн тэжээвэр амьтнаа санаж буй хүмүүсийн хувьд ч одой морьтой ойр байх нь сэтгэл санааны тайвшрал болдог гэж үүсгэн байгуулагч нь онцолжээ. Хар Сувд олон төрлийн авьяастай Байгууллагын есөн одой мориноос Хар Сувд хамгийн олон авьяастай бөгөөд төгөлдөр хуурын даралтад хоншоороороо хүрч дуу гаргах, хойд хоёр хөл дээрээ алхах, туурайгаараа алга таших чадвартай. Мөн толгой дохих, сэгсрэх, инээмсэглэж буй мэт нүүрний хөдөлгөөн гаргаад зогсохгүй урд хөлөө өндөр өргөн алхах зэрэг үйлдэл сурчээ. Эзнийх нь хэлснээр Хар Сувд хүмүүсийн эерэг хариу үйлдэлд дуртай бөгөөд үзүүлбэр хийхдээ идэвхтэй байдаг аж. Анх өөртөө хань болгохоор худалдаж авсан одой морь нь ийнхүү олон хүнтэй уулзаж, тэдэнд дэмжлэг үзүүлэх сайн үйлсийн ажлын эхлэл болсон байна.