АНУ-ын Конгрессын хоёр танхим Ардчилсан намын хяналтад шилжиж байна

АНУ-ын арваннэгдүгээр сарын 3-нд болсон Конгрессын завсрын сонгуулиар Ардчилсан нам Сенат болон Төлөөлөгчдийн танхимд олонх болох хэмжээний суудал авч, тус улсын Ерөнхийлөгч Дональд Трампын бүрэн эрхийн үлдсэн хоёр жилд улс төрийн хүчний харьцааг өөрчиллөө. Сонгуулийн дүнгээр Бүгд найрамдах намын уламжлалт ёсоор тэргүүлдэг байсан Техас зэрэг мужид хүртэл Ардчилсан намын нэр дэвшигчид ялалт байгуулсан нь сонгогчдын эдийн засгийн нөхцөл байдал болон засаг захиргааны үйл ажиллагаанд сэтгэл дундуур байгааг харуулж байна

Техас мужид Ардчилсан нам түүхэн ялалт байгууллаа Сонгуулийн хамгийн анхаарал татсан үр дүн Техас мужид гарлаа. Ардчилсан намаас нэр дэвшсэн Жеймс Таларико Бүгд найрамдах намын Кен Пакстоныг ялж, 1988 оноос хойш тус мужаас АНУ-ын Сенатад сонгогдсон анхны Ардчилсан намын төлөөлөгч болов. Мөн Ардчилсан намын Жина Инохоса Техасын амбан захирагч Грег Эбботтыг ялснаар 1995 оноос хойш тус мужийг удирдах анхны Ардчилсан намын төлөөлөгч болохоор байна. Тэрбээр Техасын анхны латин америк гаралтай эмэгтэй амбан захирагч болох юм. Ардчилсан намын амжилт зөвхөн Техасаар хязгаарлагдсангүй. Охайо мужид Шеррод Браун Бүгд найрамдах намын Жон Хастедыг ялсан бол Айова, Хойд Каролина, Өмнөд Каролина зэрэг мужид Ардчилсан нам Сенатын суудлыг Бүгд найрамдах намаас шилжүүлэн авчээ. Associated Press-ийн мэдээлснээр Ардчилсан нам Сенатын дор хаяж долоон суудлыг өрсөлдөгч намаасаа авсан байна.

Хиймэл оюуны дата төвүүдийн өргөжилтөд шинэ эрсдэл үүслээ Сонгуулийн үр дүн хиймэл оюуны дэд бүтцэд их хэмжээний хөрөнгө оруулалт хийж буй технологийн компаниудад чухал ач холбогдолтой байна. Ялангуяа АНУ-ын дата төвийн бүтээн байгуулалтын гол бүсүүдийн нэг Техас мужийн удирдлага солигдсон нь шинэ төслүүдийн зөвшөөрөл, зохицуулалтад өөрчлөлт орох хүлээлтийг нэмэгдүүлэв. Техасын амбан захирагчийн сонгуульд ялсан Жина Инохоса цахилгаан, усны хэрэглээ болон байгаль орчны шаардлагыг чангатгах хүртэл шинэ дата төвүүдийн бүтээн байгуулалтыг түр зогсоох байр суурь илэрхийлж ирсэн. Жишээ татвал хөрөнгө оруулалтын “Jefferies” банкны тооцоолсноор Инохосагийн ялалт Техаст зарлагдсан 13.1 гигаваттын хүчин чадалтай дата төвийн төслүүдэд зохицуулалтын эрсдэл үүсгэж болзошгүй. Мөн тус муж АНУ-д төлөвлөгдсөн дата төвийн төслүүдийн ойролцоогоор 26 хувийг эзэлж байгаа нь уг сонгуулийн үр дүнг технологийн салбарын хөрөнгө оруулагчдын анхаарлын төвд оруулжээ. Илон Маскийн хандив үр дүнд хүрсэнгүй Сонгуулийн үр дүн Бүгд найрамдах намын нэр дэвшигчдийг санхүүжүүлсэн технологийн салбарын тэрбумтнуудад мөн томоохон цохилт авлаа. Тэдний дунд “Tesla”, “SpaceX” компаниудын тэргүүн Илон Маск онцгой байр суурь эзэлж байв. “Business Insider”-ийн мэдээлснээр Маск 2026 оны сонгуулийн мөчлөгт 446 сая ам.доллар хандивлаж, хамгийн их хөрөнгө зарцуулсан хувь хүн болжээ. Гэвч түүний дэмжсэн Техасын Бүгд найрамдах намын гол нэр дэвшигчид ялагдсан байна. Сонгуулийн кампанит ажлын үеэр Жеймс Таларико Маскийн улс төр дэх санхүүгийн нөлөөг шүүмжилж, өөрийн гэсэн сенатортой болохын тулд мөнгөөр нөлөөлөхийг оролдож байна хэмээн буруутгаж байв. Харин сонгогчдын дунд тэрбумтнуудын улс төрд үзүүлэх нөлөө, төрийн авлигын асуудал чухал сэдэв болсон нь Ардчилсан намын кампанит ажлын нэг гол чиглэл байлаа.

Амьжиргааны өртөг сонгуулийн гол асуудал болов Ардчилсан намын ялалтад бараа, үйлчилгээний өндөр үнэ, амьжиргааны өртөг болон Трампын эдийн засгийн бодлогод хандах сонгогчдын сэтгэл дундуур байдал чухал үүрэг гүйцэтгэсэн гэж Associated Press мэдээлэв. Ялангуяа Трампын хэрэгжүүлсэн импортын тариф, Ирантай хийж буй дайн, төрийн авлигын асуудал сонгуулийн үеэр өргөн хэлэлцсэн байна. Ардчилсан нам Конгрессын хоёр танхимд олонх болох нь Трампын бүрэн эрхийн үлдсэн хугацаанд түүний хууль тогтоох санаачилгыг хязгаарлах, засаг захиргааны үйл ажиллагаанд хяналт тавих, Сенатаар хэлэлцэх томилгоонд нөлөөлөх боломжийг нэмэгдүүлэхээр байгаа юм. Гэхдээ шинэ Конгрессын бүрэн эрх 2027 оны нэгдүгээр сард эхлэх бөгөөд ерөнхийлөгчийн хориг тавих эрх хэвээр үлдэх юм.