“Туулын хурдны зам”-ын трассыг өөрчилж, ирэх онд “Баруун гарц” зам барихаар төлөвлөжээ

“Туулын хурдны зам” төслийн трассыг өөрчилж, Улаанбаатарын баруун чиглэлийн хөдөлгөөний ачааллыг хуваарилах “Баруун гарц” хурдны замыг ирэх онд барихаар төлөвлөж байгаа талаар нийслэлээс мэдээллээ. Засаг дарга Б.Пүрэвдагва аравдугаар сарын 29-нд танилцуулсан мэдээлэлдээ уг замыг 14.3 километр урт, зургаан эгнээтэй байхаар тооцсоныг дурджээ.

Улаанбаатараас баруун чиглэлийн 16 аймаг руу зорчих тээврийн хэрэгслийн орц, гарцыг нэмэгдүүлэх шаардлагатай байгааг тэрбээр онцлон, наадмын үеэр Эмээлт тийш зорчигчид 2–8 цаг түгжирсэн тохиолдлуудыг дурдаж, шинэ зам барих үндэслэлээ тайлбарласан байна.

Үүнээс гадна Эмээлтээс Өлзийт хороолол хүртэл 12 километр, дөрвөн эгнээтэй зам барихаар төлөвлөжээ. Нийслэлийн танилцуулсан төлөвлөгөөнд эдгээр замаар хөдөлгөөний урсгалыг өөр чиглэлд хуваарилж, авто замын хүртээмжийг нэмэгдүүлэхээр тооцсон байна.

“Туулын хурдны зам”-ын трассыг өөрчлөх санал өмнө нь ч яригдаж байв. Б.Пүрэвдагва есдүгээр сарын 16-нд уг төсөлд 500 тэрбум төгрөг шилжүүлсэн байсан талаар мэдээлээд гэрээний хүрээнд трассыг өөрчлөн, түгжрэлийг бууруулахад үр нөлөөтэй зам барих байр сууриа илэрхийлжээ. Тухайн үед хуулийн байгууллагын шалгалт дуусаагүй учраас ажлыг эхлүүлэх боломжгүй байгааг мөн мэдэгдэж байв.