АИ-92 автобензиний 10 хоногийн нөөцтэй байна: Иргэдийг шатахуун түгээх станцуудад дараалал үүсгэхгүй байхыг уриалав

Монгол Улс өнөөдрийн байдлаар АИ-92 автобензиний ойролцоогоор 10, дизель түлшний 28, онгоцны түлшний 36 хоногийн нөөцтэй байгааг Аж үйлдвэр, эрдэс баялгийн дэд сайд Б.Мөнхтамир мэдээллээ.

Шатахууны шуурхай штабын ээлжит мэдээллийн үеэр тэрбээр импортын захиалга, нийлүүлэлт болон төмөр замын тээвэрлэлтийн нөхцөл байдлыг танилцуулсан байна. ОХУ-ын Ангарскийн газрын тос боловсруулах үйлдвэрээс аравдугаар сард захиалсан 57 мянган тонн шатахууны 51 мянган тонныг ачиж, үлдсэн 5,700 тонн нь тээвэрлэлтийн шатанд байгаа аж. Ингэснээр аравдугаар сарын захиалгын гүйцэтгэл хангагдана гэж үзэж байгаа аж.

Мөн БНХАУ-аас захиалсан 8,000 тонн автобензин бүрэн нийлүүлэгджээ.

Арваннэгдүгээр сард 92 мянган тонн шатахуун импортлохоор захиалжээ

Монгол Улс арваннэгдүгээр сарын шатахууны нийлүүлэлтийг нэмэгдүүлэх зорилгоор дөрвөн улсаас нийт 92 мянган тонн шатахуун захиалсан байна.

Тодруулбал:

ОХУ-70 мянган тонн

БНХАУ-8 мянган тонн

БНСУ-12 мянган тонн

Казахстан-3 мянган тонн

Эдгээр захиалга нь ердийн үеийн сарын хэрэглээнээс ойролцоогоор 20 мянган тонноор илүү байгааг дэд сайд онцолсон байна.

Төмөр замд шатахуунтай 1,500 орчим галт тэрэг байна

Шатахууны нийлүүлэлтэд үүссэн саатлын гол шалтгаан нь төмөр замын тээврийн эргэлттэй холбоотойг тэрбээр тайлбарлалаа.

Улаанбаатар төмөр замын сүлжээнд 200 орчим шатахуунтай галт тэрэг байгаа бөгөөд энэ нь 7–8 хоногийн хэрэглээтэй тэнцэх хэмжээний бүтээгдэхүүн аж.

Үүнээс гадна төмөр замын хэмжээнд шатахууны төрлийн бүтээгдэхүүн ачсан нийт 1,500 орчим вагон байгааг мэдээлжээ.

Шуурхай буулгаж, ОХУ руу буцааснаар тээврийн эргэлтийг нэмэгдүүлж, дараагийн шатахууны ачилтыг түргэсгэх боломжтой гэж үзэж байгаа аж.

Мөн арав, арваннэгдүгээр сар зунаас өвлийн түлшинд шилжих үе тул тээвэрлэлт, хадгалалтад нэмэлт ачаалал үүсдэг байна.

Харин өвлийн түлшний нөөц хангалттай бүрдсэн гэж шуурхай штабаас мэдээллээ.

Шатахууны нөөцийг гурван сарын хэрэглээнд хүргэхээр зорьж байна

Импортын нийлүүлэлтээс гадна шатахуун хадгалах хүчин чадлыг нэмэгдүүлэхээр ажиллаж байгааг Аж үйлдвэр, эрдэс баялгийн яамнаас мэдээлжээ.

Тухайлбал, “Шинэ эрин” компанийн шинээр барьсан 16 мянган шоо метр багтаамжтай шатахуун хадгалах байгууламж ашиглалтад ороход бэлэн болсон байна.

Цаашид шатахууны савны багтаамжийг нэмэгдүүлж, улсын хэмжээнд хамгийн багадаа гурван сарын хэрэглээг хангах нөөц бүрдүүлэх зорилт тавьжээ.

Дэд сайдын өгүүлснээр ОХУ, БНХАУ, БНСУ-тай хийж буй хамтын ажиллагааны хүрээнд шатахууны нийлүүлэлт тасрахгүй тул иргэдийг шатахуун түгээх станцуудад дараалал үүсгэхгүй байхыг уриалав.