Сургуулийн орчны хүчирхийллээс сэргийлэхэд чиглэсэн 4 сая ам.долларын төсөл хэрэгжүүлнэ

Монгол Улсын Засгийн газар, Азийн хөгжлийн банк хүүхэд, эмэгтэйчүүдийн эсрэг хүчирхийллээс урьдчилан сэргийлэх, хариу арга хэмжээ авах тогтолцоог бэхжүүлэх гурван сая ам.долларын буцалтгүй тусламжийн төслийн гэрээнд гарын үсэг зурлаа. Засгийн газраас нэг сая ам.доллар нэмж санхүүжүүлснээр төслийн нийт төсөв дөрвөн сая ам.доллар болох юм.

“Монгол дахь жендэрт суурилсан хүчирхийллээс сэргийлэх, хариу арга хэмжээ авах” төслийн хүрээнд дөрвөн сургуулийн дотуур байрыг аюулгүй байдал, хүртээмж, гамшигт тэсвэртэй байдлын шаардлагад нийцүүлэн шинэчилнэ. Мөн 12 сургуульд хүчирхийллээс урьдчилан сэргийлэх хөтөлбөр хэрэгжүүлж, сургалтын хэрэглэгдэхүүнийг шинэчлэх, багш, ажилтнуудыг сургах, эцэг эх, асран хамгаалагчдын оролцоог нэмэгдүүлэхээр төлөвлөжээ. Сургуулийн орчны дээрэлхэлтээс гадна цахим дарамт, хүчирхийллээс хүүхдийг хамгаалах арга хэмжээг хөтөлбөрт багтаасан байна.

Хүчирхийлэлд өртсөн болон эрсдэлт нөхцөлд байгаа хүүхэд, залуучууд, эмэгтэйчүүдэд зориулсан нөхөн сэргээх, чадавхжуулах хөтөлбөрүүдийг хэрэгжүүлж, тусламж, үйлчилгээний чанар, хүртээмжийг сайжруулна. Үүний зэрэгцээ багш, нийгмийн ажилтан, сэтгэл зүйч зэрэг хүүхэд, гэр бүлтэй шууд ажилладаг мэргэжилтнүүдийн ур чадварыг дээшлүүлж, хүчирхийллээс сэргийлэх бодлого, хариу арга хэмжээний тогтолцоог боловсронгуй болгоход дэмжлэг үзүүлэх юм.

Буцалтгүй тусламжийн нэг сая ам.долларыг Азийн хөгжлийн сан, хоёр сая ам.долларыг Японы Засгийн газрын санхүүжилттэй “Цэцэглэн хөгжсөн, сөрөг нөлөөнд тэсвэртэй Ази, Номхон далайн бүс нутгийг цогцлоох Японы сан”-аас олгох болжээ.