Богдхан уулын зэрлэг амьтад авто замыг аюулгүй гарах гарцтай болно
Экологийн гарцын барилга бүтээцийн ажил эхэллээ. NCD группийн хөрөнгө оруулалтаар хэрэгжүүлнэ. 2027 оны хоёрдугаар улиралд дуусгахаар төлөвлөжээ.
Богдхан уулын зэрлэг амьтдын нүүдэл, шилжилт хөдөлгөөнд авто замаас учруулах саадыг бууруулах экологийн гарцын ажил эхэллээ. Уг гарц нь амьтдыг аюулгүй зорчих нөхцөлөөр хангаж, амьдрах орчны холбоосыг хадгалах зориулалттай юм.
Төслийг ШУА-ийн Биологийн хүрээлэнгийн судалгаа, дүгнэлтэд үндэслэн, Байгаль орчин, уур амьсгалын өөрчлөлтийн яамны захиалгаар NCD группийн хөрөнгө оруулалтаар хэрэгжүүлж байна. Богдхан уулын дархан цаазат газрын хамгаалалтын захиргаа мөн оролцож байгаа аж.
Энэхүү бүтээн байгуулалтыг байгаль хамгааллын хөрөнгө оруулалтад татварын хөнгөлөлт үзүүлэх зохицуулалттай уялдуулан хэрэгжүүлж буйгаараа онцлог. Тодруулбал, Аж ахуйн нэгжийн орлогын албан татварын тухай хуулийн холбогдох заалтыг ашиглан хувийн хэвшлийн хөрөнгө оруулалтыг зэрлэг амьтдын амьдрах орчныг хамгаалахад чиглүүлж байна.
Гарц байгуулах санаачилгыг өнгөрсөн наймдугаар сард Улаанбаатарт болсон COP17 хурлын үеэр гаргаж, санамж бичиг байгуулжээ. Барилга бүтээцийн ажлыг 2027 оны хоёрдугаар улиралд бүрэн дуусгахаар төлөвлөснийг яам мэдээллээ.
Зургийн тайлбар: Богдхан уулын зэрлэг амьтдын нүүдлийн замыг хамгаалах экологийн гарцыг хувийн хэвшлийн хөрөнгө оруулалтаар байгуулж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
