Холливудын жүжигчин Д.Жонсон бэлгийн боловсролыг хойш тавьчхаад эрүүл харилцаа хүлээж буй нийгмийг шүүмжилжээ

Холливудын жүжигчин Дакота Жонсон бэлгийн боловсрол, дотно харилцааны талаарх нийгмийн ойлголтыг өөрчлөх шаардлагатай гэж үзэж буйгаа “Maude” брэндийн үүсгэн байгуулагч Эва Гойкочеатай хамт өгсөн ярилцлагадаа онцолжээ. Тэдний үзэж буйгаар бэлгийн эрүүл мэндийн тухай нээлттэй, аюулгүй орчинд ярилцах боломж бүрдүүлэх нь хүмүүсийг ичгүүр, буруу ойлголтоос ангижруулахад чухал ач холбогдолтой аж. Жонсон анх бэлгийн эрүүл мэндийн чиглэлээр өөрийн брэндийг байгуулахаар төлөвлөж байсан ч “Maude”-тай танилцсанаар хамтран ажиллах шийдвэр гаргасан байна. Тэрбээр тус салбарын олон брэндийн бүтээгдэхүүний загвар, сурталчилгаа эмэгтэйчүүдийн бэлгийн амьдралыг хэт өнгөц, заримдаа дорд үзсэн байдлаар дүрсэлдэг гэж шүүмжилжээ.

Бүтээгдэхүүний загвараар дамжуулан ичгүүртэй гэсэн ойлголтыг өөрчлөх нь “Maude” нь бэлгэвч, тосолгооны бүтээгдэхүүн болон насанд хүрэгчдийн дотно хэрэглээний хэрэгслүүдийг энгийн, минималист загвараар үйлдвэрлэдэг брэнд аж. Тус брэндийн бүтээгдэхүүнүүд АНУ-ын “Sephora”, “Ulta Beauty” зэрэг жижиглэн худалдааны сүлжээнд борлуулагддаг бөгөөд үүгээр ч зогсохгүй хоёр бүтээгдэхүүн нь 2024 онд Парисын Musée des Arts Décoratifs музейн “Private Lives” үзэсгэлэнд багтаж байсан удаатай. Гойкочеагийн тайлбарласнаар бүтээгдэхүүний загвар нь зөвхөн гадаад үзэмжийн асуудал биш, харин тухайн бүтээгдэхүүнтэй холбоотой нийгмийн сөрөг ойлголтыг өөрчлөх нэг арга юм. Тэрбээр мөн бэлгийн хүчирхийлэлд өртсөн зарим хэрэглэгч бүтээгдэхүүний “энгийн бөгөөд төвийг сахисан” загвар нь өөрийгөө эвгүй байдалд орж буй мэт мэдрэхгүйгээр бэлгийн эрүүл мэндийн талаар дахин бодож үзэхэд тусалсан тухай захидал илгээдэг гэж ярьжээ.

Бэлгийн боловсрол өсвөр насанд дуусах ёсгүй Гойкочеа АНУ-ын сургуулиудад бэлгийн боловсролын талаар хязгаарлагдмал хугацаанд заадаг нь насанд хүрсэн хойноо дотнын хүнтэйгээ дотно харилцаа, бэлгийн эрүүл мэндийн асуудлаар ярилцахад хүндрэл үүсгэж болзошгүй гэж үзэж байна. Түүний хэлснээр хүмүүс амьдралынхаа үе шат бүрд өөрийн бие махбод, хүсэл сонирхол, дотно харилцааны талаар шинэ зүйл сурдаг учраас бэлгийн боловсролыг зөвхөн өсвөр насныханд зориулсан хичээлээр хязгаарлах нь хангалтгүй юм. Жонсон мөн бэлгийн боловсролын талаар нээлттэй ярилцах боломж хомс байгаа нь хүмүүс өөрийн мэдрэмж, хүсэл сонирхлыг ойлгоход хүндрэл учруулдаг гэж үзжээ.

1976 оны судалгаа өнөөдөр ч яригдсаар байна Ярилцлагын үеэр эмэгтэйчүүдийн бэлгийн амьдралын талаарх ойлголтыг өөрчилсөн судлаач Шер Хайтын бүтээлийг мөн хөнджээ. Хайт 1976 онд хэвлүүлсэн “The Hite Report: A Nationwide Study of Female Sexuality” номдоо олон мянган америк эмэгтэйн бэлгийн амьдралын талаарх судалгааг танилцуулсан юм. Тус бүтээлийн судалгаанд оролцсон эмэгтэйчүүдийн 70 орчим хувь нь зөвхөн уламжлалт байдлаар дотно харилцаанд орсноор дур ханадаггүй гэсэн дүгнэлт гарсан нь тухайн үед нэлээд өргөн маргаан дагуулаад амжжээ. Үүний зэрэгцээ Жонсоны “TeaTime” продакшн компани Хайтын амьдрал, судалгааны тухай “The Disappearance of Shere Hite” баримтат киноны бүтээлд оролцсон бөгөөд Жонсон өөрөө өгүүлэгчээр ажилласан байна. Тэрбээр Хайт тухайн үеийн нийгмийн дотно харилцааны талаарх тогтсон ойлголтыг эсэргүүцэн судалгааны үр дүнгээ олон нийтэд хүргэснийхээ төлөө айхтар шүүмжлэлтэй тулгарсныг онцлов.

Кино, телевиз бэлгийн боловсролын орон зайг нөхөж чадах уу? Жонсон стриминг үйлчилгээний “Netflix” платформын “Sex Education” цувралыг бэлгийн харилцааны тухай яриаг олон нийтэд хавьгүй ойртуулсан бүтээл гэж үнэлсэн ч суурь мэдлэг олгох тал дээр хангалтгүй гэж үзэж буйгаа хэлжээ. Тэрбээр мөн “Pillion” кино бэлгийн өөрийгөө танин мэдэх тухай ердийн бус өнцгөөс өгүүлдгийг жишээ болгосон байна. Гэхдээ үзэгчид дэлгэцээр харсан зүйлээ бодит амьдралдаа хэрхэн ойлгож, хэрэгжүүлдэг нь түүнд эргэлзээтэй хэвээр байгаа аж. Ярилцлагын төгсгөлд Жонсон хүүхдэд зориулсан боловсролын контент бүтээгч Мисс Рэйчелтэй адил, бэлгийн боловсролыг энгийн ойлгомжтой тайлбарладаг хүн хэрэгтэй болсон юм биш биз гэсэн асуултыг дэвшүүлжээ.