Шатахууны түгээлтийг хоёр хоногийн дотор хэвийн болгохоор төлөвлөж байна

Аж үйлдвэр, эрдэс баялгийн яамнаас пүрэв гарагт хийсэн мэдээлснээр, шатахууны нийлүүлэлт саатсантай холбоотойгоор нийслэлийн шатахуун түгээх станцуудад үүссэн дарааллыг ойрын нэг, хоёр хоногт бууруулж, түгээлтийг хэвийн болгохоор ажиллаж байгааг мэдээллээ.

Албаны тайлбарласнаар өнгөрсөн амралтын өдрүүдэд ОХУ-д төмөр замын вагонд засвар гарч, шатахууны ачилт хоёр хоногийн турш зогссон байна. Үүний дараа шатахууны хомсдол үүсэхээс болгоомжилсон иргэдийн эрэлт нэмэгдэж, шатахуун түгээх станцуудын дараалал уртассан гэж Шуурхай штаб үзэж байна.

Аравдугаар сард ОХУ-аас захиалсан 57,000 тонн шатахууны 45,000 орчим тонныг өнөөдрийн байдлаар нийлүүлсэн байна. Харин ОХУ, БНХАУ-аас импортолсон шатахууны нийт хэмжээ 60 мянган тоннд хүрснийг салбарын дэд сайд мэдээлэв.

Түүнчлэн сүүлийн хоёр хоногт 150 орчим вагон шатахуун орж ирсэн бөгөөд ОХУ-ын Ангарскийн үйлдвэрээс аравдугаар сарын 24, 25-нд ачсан 76 вагон бүрэн иржээ. БНХАУ-аас захиалсан 8,000 тонн шатахууны эхний 3,000 тонн өнөөдрөөс Эрээн–Замын-Үүд боомтоор нэвтэрч эхэлсэн байна.

Гэхдээ нийлүүлэлт үргэлжилж байгаа ч шатахуун түгээх станцуудын дараалал бүрэн арилаагүй байна. Нийслэлийн хэмжээнд үйл ажиллагаа явуулдаг 264 шатахуун түгээх станцын 120 орчим нь шатахууныг хэвийн олгож эхэлснийг Шуурхай штаб мэдээлжээ. Энэ нь нийт станцын ойролцоогоор 45 хувь юм.