Израилын сонгуульд Б.Нетаньяхугийн эвсэл Засгийн газар байгуулах олонх бүрдүүлж чадахгүй нь

Израилын парламентын сонгуулийн санал тооллогын урьдчилсан дүнгээр Ерөнхий сайд Биньямин Нетаньяхугийн тэргүүлсэн барууны үзэл баримтлалтай эвсэл өрсөлдөгчөөсөө илүү суудал авахаар байгаа ч Засгийн газар байгуулахад шаардлагатай олонхыг бүрдүүлж чадсангүй. Саналын 85 хувийг тоолоход Нетаньяхугийн Ликуд нам болон хэт барууны, хэт ортодокс еврей намуудын эвсэл 53 суудал авахаар байна. Харин Зэвсэгт хүчний Жанжин штабын дарга асан Гади Айзенкотын Яшар нам болон түүний эвсэлд багтсан сөрөг хүчний гурван нам нийт 48 суудал авах төлөвтэй байгаа юм. Израилын 120 суудалтай Кнессетэд Засгийн газар байгуулахын тулд 61 суудлын дэмжлэг шаардлагатай. Одоогийн тооллогоор аль ч эвсэл уг босгод хүрээгүй бөгөөд хоёр тал Засгийн газар байгуулах хэлэлцээ эхлүүлэхээ мэдэгдээд буй.

Араб намуудын төлөөлөл бараг хоёр дахин нэмэгдэх төлөвтэй байна Сонгуулийн урьдчилсан дүнгээр араб иргэдийг төлөөлсөн Нэгдсэн арабын жагсаалт болон Хамтарсан жагсаалт намуудын хувьд нийт 19 суудал авахаар байгаа нь өмнөх сонгуулиудын дүнгээс дорвитой ахисан дүн болох юм. Израилын хүн амын 20 орчим хувийг араб иргэд бүрдүүлдэг бөгөөд энэ удаагийн сонгуульд тэдний оролцоо нэмэгдсэн нь араб намуудын суудлын тоо өсөхөд голлон нөлөөлжээ. Хэрэв Айзенкотын эвсэл араб намуудын дэмжлэгийг авч чадвал Засгийн газар байгуулах боломж нээгдэнэ. Гэвч түүний эвсэлд багтдаг барууны намууд араб намуудтай хамтран ажиллахыг эрс эсэргүүцэж байгаа нь яриа хэлэлцээг хүндрүүлж буй. Нэгдсэн арабын жагсаалт намын тэргүүн Мансур Аббас сөрөг хүчний эвсэлтэй хамтран 61 суудлын дэмжлэг бүрдүүлэх боломжтой гэж найдаж буйгаа илэрхийлсэн. Мөн зүүний үзэл баримтлалтай Ардчилсан намын тэргүүн Яир Голан араб намуудтай хамтарч Засгийн газар байгуулахыг дэмжжээ. Харин Нетаньяху араб намуудын дэмжлэгт тулгуурласан Засгийн газар байгуулахыг эсэргүүцэж, барууны намуудын эвэл Засгийн газрын эрхийг үргэлжлүүлэн барих шаардлагатай гэж мэдэгдсэн байна.

Эцсийн дүн гарсны дараа эвслийн хэлэлцээ эхэлнэ Одоогоор цэргийн алба хаагчид, дипломат ажилтнууд, эмнэлэгт хэвтэн эмчлүүлэгчид зэрэг сонгогчдын 430,000–480,000 саналын хуудсыг хараахан тоолоогүй байгаа тул эцсийн дүн гарахад нэгээс хоёр өдөр шаардлагатай гэж эх сурвалж мэдээлжээ. Израилын Ерөнхийлөгч Ицхак Херцог албан ёсны дүнг хүлээн авсны дараа парламентад суудал авсан намуудтай зөвлөлдөж, Засгийн газар байгуулах хамгийн боломжтой гэж үзсэн улс төрийн удирдагчид үүрэг өгөх юм. Мөн Херцог дахин сонгууль явуулах нөхцөлөөс зайлсхийхийг улс төрийн намуудад уриалжээ. Хэрэв намууд олонхын дэмжлэгтэй Засгийн газар байгуулж чадахгүй бол Израил дахин парламентын сонгууль явуулж магадгүй байна.