Нийслэл Улаанбаатар хот байгуулагдсаны 387 жилийн ой тохиож байна

Монгол Улсын нийслэл Улаанбаатар хот үүсэн байгуулагдсаны 387 жилийн ой өнөөдөр буюу аравдугаар сарын 29-нд тохиож байна. Өдгөө улсын нийт хүн амын талаас илүү хувь нь оршин суудаг нийслэл хотын түүх 1639 онд анхны Өргөөг байгуулсан үеэс эхтэй.

Түүхэн тэмдэглэлд дурдсанаар 1639 онд Түшээт хан Гомбодоржийн таван настай хүү Занабазарыг Халхын ноёдын чуулганаар Монголын шарын шашны тэргүүнд өргөмжилж, түүнд зориулан орд өргөө байгуулжээ. Уг өргөөг өнөөгийн Өвөрхангай аймгийн Бүрд сумын нутаг, Их Монгол уулын өвөр, Бага Монгол уулын ар бэл дэх Ширээт цагаан нуурын хөвөөнд байгуулсан нь Улаанбаатар хотын үүслийн үндэс болсон гэж үздэг.

Анх Өргөө хэмээн нэрлэгдэж байсан тус төв 1651 оноос Номын хүрээ, 1706 оноос Их хүрээ хэмээн нэрлэгдэх болжээ. Улмаар шашин, төр, худалдаа, харилцааны төв болон өргөжих явцдаа 1639–1778 оны хооронд нийт 28 удаа нүүдэллэсэн байна.

Их хүрээ 1778 онд Туул голын хөвөө, Сэлбийн дэнж орчмын Хүн чулууны хонхор хэмээх газарт суурьшиж, дахин нүүгээгүй аж. Тухайн газар нь өнөөгийн Монгол Улсын Боловсролын их сургуулийн баруун талын төв замын уулзвар орчимд хамаардаг.

Монгол Улс 1911 онд тусгаар тогтнолоо сэргээн тунхагласны дараа Их хүрээний улс төр, эдийн засаг, шашин, соёлын төвийн үүрэг улам тодорхой болжээ. Улмаар 1912 оны хоёрдугаар сарын 9-нд Их хүрээг хаант Монгол Улсын Нийслэл хүрээ хэмээн зарласан байна.

Харин 1924 онд Нийслэл хүрээг Улаанбаатар хэмээн нэрлэснээр өнөөгийн нэршил тогтсон түүхтэй. Ийнхүү нүүдлийн Өргөөнөөс эхэлсэн нийслэлийн түүх 387 дахь жилтэйгээ золгож байна.