Нотариатын зарим үйлчилгээг цахимаар авах боломж бүрдүүлэх хуулийн төслийг УИХ-д өргөн мэдүүлэх боллоо
Засгийн газар Нотариатын тухай хуульд нэмэлт, өөрчлөлт оруулах тухай хуулийн төсөл болон холбогдох бусад хуулийн төслийг УИХ-д өргөн мэдүүлэхээр тогтжээ.
Иргэд нотариатын зарим үйлчилгээг цахимаар, байгаа газраасаа авах эрх зүйн боломжийг бүрдүүлэхээр Нотариатын тухай хуульд нэмэлт, өөрчлөлт оруулах тухай хуулийн төслийг боловсруулжээ. Засгийн газар уг төсөл болон хамт боловсруулсан бусад хуулийн төслийг хэлэлцэж, УИХ-д өргөн мэдүүлэхээр тогтсон байна.
Хуулийн төсөлд зайн гэрчлэлтийн зохицуулалтыг шинээр тусгаснаар иргэд гэрээ, хэлцэл, итгэмжлэл болон гарын үсгийн үнэн зөвийг нотариатчаар цахимаар гэрчлүүлэх боломжтой болох юм. Харин гэрээслэл, өв залгамжлал, эд хөрөнгийн эрхийн бүртгэлтэй холбоотой нотариатын үйлдлийг зайнаас гүйцэтгэхгүй байхаар тусгажээ.
Зайн гэрчлэлтийг нэвтрүүлснээр гадаад улсад болон Монголын алслагдсан бүс нутагт амьдардаг иргэд нотариатын тодорхой үйлчилгээг заавал биечлэн очихгүйгээр авах боломж бүрдэхээр байна. Мөн Иргэний хуульд заасан цахим хэлбэрээр хэлцэл байгуулах зохицуулалтын хэрэгжилтийг дэмжих зорилготой аж.
Түүнчлэн хуулийн төсөлд зорилтот бүлгийн иргэдийн нотариатын үйлчилгээний зардлыг бууруулах зохицуулалт тусгасан байна. Тухайлбал, хөгжлийн бэрхшээлтэй иргэд болон ахмад настнуудын гэрээслэл, өв залгамжлал, үл хөдлөх хөрөнгөтэй холбоотой үйлдлээс бусад нотариатын үйлчилгээний хөлсийг хөнгөлөхөөр тусгажээ.
Харин хөдөлмөрийн чадвараа бүрэн алдсан иргэд, олон хүүхэдтэй өрх толгойлсон эцэг, эх, эрсдэлт нөхцөлд байгаа хүүхэд, гэрч, хохирогч болон хуульд заасан бусад зорилтот бүлгийн иргэдийг хууль зүйн туслалцаа авахтай холбоотой итгэмжлэл, баримт бичгийн хуулбар гэрчлүүлэх үйлчилгээний хөлс, зардлаас чөлөөлөхөөр боловсруулсан байна.
Холбоотой мэдээ
