"Д.Трамп Бүгд найрамдах нам завсрын сонгуульд ялагдвал Канадыг буруутгаж магадгүй"

АНУ-ын завсрын сонгуульд Бүгд Найрамдах нам тааруу үр дүн үзүүлбэл Ерөнхийлөгч Дональд Трамп Канад улсыг буруутгаж болзошгүй талаар АНУ-аас Канад улсад суугаа Элчин сайд Пит Хукстра бизнесийн төлөөлөгчдөд анхааруулсан гэж Канадын “CTV News” мэдээлжээ. Гэхдээ АНУ-ын Элчин сайдын яам уг мэдээллийг няцааж, Элчин сайдын хэлсэн үгийг анхны агуулгаас нь "гажуудуулсан" хэмээн тайлбарласан байна.

“CTV News”-ийн мэдээлснээр Хукстра лхагва гарагт болсон хаалттай уулзалтын үеэр АНУ-ын Мэн, Мичиган зэрэг мужийн өрсөлдөөнтэй сонгуулиудад Ардчилсан нам ялалт байгуулбал Трамп сонгуулийн үр дүнг Канадтай холбон тайлбарлаж, улмаар хоёр улсын харилцаанд хүндрэл учруулж болзошгүйг дурджээ.

Энэ талаар Канадын Ерөнхий сайд Марк Карни сэтгүүлчдийн асуултад хариулахдаа уг асуудлыг ийнхүү тайлбарлаж байгаа нь "сонирхолтой хэрэг" хэмээн хэлсэн байна.

АНУ, Канадын хооронд хэдэн сарын турш үргэлжилж буй тарифын маргааны хүрээнд Оттава АНУ-ын импортын тарифт хариу арга хэмжээ авч, Канадтай хийх худалдаанаас ихээхэн хамаардаг мужуудын бараа бүтээгдэхүүнд нэмэлт тариф ногдуулсан юм. Харин худалдааны шинэ тохиролцоонд хүрэх боломж гарвал хэлэлцээ хийхэд бэлэн ч одоогоор тийм нөхцөл бүрдээгүй байгааг Карни онцолжээ.

Канадын улстөрчдийг сонгуульд хөндлөнгөөс оролцсон хэмээн буруутгажээ

Элчин сайд Пит Хукстра өмнө нь Канадын улстөрчдийг АНУ-ын дотоод улс төрд оролцож байна хэмээн шүүмжилж байсан удаатай. Тэрбээр Канадын эрх бүхий албан тушаалтнууд АНУ-ын хэвлэл мэдээллийн хэрэгслээр тарифын бодлогыг шүүмжилсэн, мөн Онтарио муж Америкийн телевизүүдээр тарифын эсрэг сурталчилгаа явуулсан зэрэг үйлдлийг сонгуульд хөндлөнгөөс оролцох эрсдэлтэй хэмээн дүгнэжээ.

Хукстра мөн Канадын нэгэн подкастад оролцохдоо эдгээр үйлдлийг АНУ-ын тал ажиглаж, үнэлж байгааг мэдэгдээд сонгуульд хөндлөнгөөс оролцсон нь тогтоогдвол хариу арга хэмжээ авна хэмээн анхааруулсан байна.

Харин Канадын Аж үйлдвэрийн сайд Мелани Жоли уг буруутгалыг няцааж, Канад улс өөр улсын сонгуульд хөндлөнгөөс оролцохгүй гэдгийг мэдэгджээ. Марк Карни ч мөн ийм буруутгал нь үндэслэлгүй хэмээн тодорхойлж, АНУ-ын Элчин сайдын мэдэгдэлд сэтгэл дундуур буйгаа илэрхийлсэн байна.

Хукстрагийн мэдэгдлүүд Канад улсад өмнө нь ч шүүмжлэл дагуулж байв. Тухайлбал, Трамп Канад улсыг АНУ-ын 51 дэх муж болгох талаар ярьсныг тэрбээр найрсаг хандлагын илэрхийлэл гэж тайлбарлаж байсан юм. Мөн Канадын 2025 оны парламентын сонгуулийг Америкийн эсрэг шинжтэй хэмээн тодорхойлж байжээ.

Энэ онд Канадын 225,000 гаруй иргэн гарын үсэг зурсан өргөдлөөр Хукстраг дипломат ёс зүй зөрчсөн гэх үндэслэлээр "persona nan grata" буюу "тааламжгүй этгээд" хэмээн зарлан улсаас гаргахыг шаардсан байна.

Persona nan grata нь 1961 оны Дипломат харилцааны тухай Венийн конвенцын есдүгээр зүйлээр зохицуулагддаг бөгөөд тухайн улсын Засгийн газар гадаадын дипломат ажилтан эсвэл төлөөлөгчийг хүлээн зөвшөөрөх боломжгүй хэмээн үзэж, эх орноосоо хөөх, эсвэл тус улсын нутаг дэвсгэрт нэвтрэхийг хориглохыг хэлнэ.