Хятадын технологийн хувьцааны ханш унаж, хиймэл оюуны хөрөнгө оруулалтын өгөөж эргэлзээ дагуулж байна

Хятадын технологийн компаниудын хувьцааны ханш огцом буурч, хиймэл оюуны салбарын өсөлт бодит ашиг боох эсэхэд хөрөнгө оруулагчид эргэлзэж эхэллээ. Шанхайн хөрөнгийн биржийн технологийн хамгийн том, хөрвөх чадвар өндөртэй 50 компанийн хувьцааг хамардаг STAR 50 индекс долдугаар сарын оргил түвшнээсээ 40 гаруй хувиар унажээ. Тус зах зээлд хагас дамжуулагч, хиймэл оюун болон өндөр технологийн компаниуд төвлөрдөг. Хятадын технологийн салбарын өсөлт 2025 оны эхээр дотоодын хиймэл оюуны DeepSeek загвар олон улсын анхаарлыг татсанаар эрчимжсэн. Тухайн үед Хятадын компаниуд хиймэл оюуны салбарт АНУ-ын өрсөлдөгчидтэй эн зэрэгцэх боломжтой гэсэн хүлээлт хөрөнгө оруулагчдын дунд нэмэгдсэн юм. Гэвч компаниудын зах зээлийн үнэлгээ ашиг орлогын бодит өсөлтөөс түрүүлж нэмэгдсэн нь хувьцааны ханшид “correction” буюу засвар хөдөлгөөн үүсэх нөхцөл бүрдүүлжээ.

Салбарын талаарх өөдрөг байр суурь ганхаж байна “China Market Research Group” судалгааны байгууллагын шинжээч Бенжамин Кавендерийн тайлбарласнаар хувьцааны ханшийн уналт эхэндээ өсөлтийн дараах ашиг авах арилжаа болон өндөр үнэлгээний засвар хөдөлгөөнөөс үүдсэн ч одоо хиймэл оюуны салбарын талаарх өөдрөг хүлээлтийг компаниудын ашигт ажиллагаа зөвтгөж чадах эсэх асуудалд төвлөрч байна. Мөн “JPMorgan Asset Management”-ийн Ази, Номхон далайн бүсийн зах зээлийн ахлах стратегич Тай Хуй технологийн компаниуд хиймэл оюунд зарцуулж буй хөрөнгөө хэрхэн ашиг болгохыг хөрөнгө оруулагчид анхаарч байгааг онцолжээ. Түүнчлэн хиймэл оюуны чиглэлийн хэд хэдэн компанийн IPO эрэлт анхандаа өндөр байсан ч одоо хөрөнгө оруулагчдын сонирхол буурсан байна. Үүний зэрэгцээ Хятадын үл хөдлөх хөрөнгийн зах зээлийн удаан үргэлжилсэн уналт өрхийн итгэлцэл, хэрэглээнд сөргөөр нөлөөлж, цахим худалдаа болон зар сурталчилгаанаас орлого олдог томоохон технологийн компаниудын өсөлтийг хязгаарлаж буй. “Union Bancaire Privée” банкны хувьцааны зах зээлийн ахлах зөвлөх Вэй-Серн Лингийн үзэж буйгаар хиймэл оюуны хөрөнгө оруулалтын зардал нэмэгдэх нь ойрын хугацаанд компаниудын ашигт ажиллагааг сулруулж болзошгүй бөгөөд урт хугацаанд уг хөрөнгө оруулалтаас орлого олох боломжтой эсэх нь тодорхойгүй байна.

Хувьцааны үнэлгээ буурсан ч зах зээл мөд сэргэх шинжгүй байна Үүний зэрэгцээ Хятадын технологийн компаниудын нөхцөл байдал харилцан адилгүй байгааг “KraneShares” хөрөнгө оруулалтын компанийн хөрөнгө оруулалт хариуцсан захирал Брендан Ахерн онцолжээ. Тухайлбал, Шанхайн биржид бүртгэлтэй хагас дамжуулагч үйлдвэрлэгчид Хятад болон АНУ-ын технологийн томоохон компаниудын хөрөнгө оруулалтаас ашиг хүртэж байгаа бол Хонконгийн биржид бүртгэлтэй цахим худалдаа, интернэт үйлчилгээний компаниуд Хятадын дотоодын хэрэглээ сул байгаагаас шалтгаалан хүндрэлтэй хэвээр байна. Харин “Rayliant Global Advisors” компанийн ТУЗ-ийн дарга Жейсон Сүгийн үзэж буйгаар Хятадын технологийн хувьцааны ханшийн уналтад АНУ-ын хөрөнгийн зах зээлийн сулрал мөн нөлөөлжээ. Хоёр улсын хөрөнгө оруулагчид хиймэл оюуны салбарт зарцуулж буй их хэмжээний хөрөнгө бодит ашиг авчрах эсэхэд эргэлзэж байгаа тул АНУ-ын технологийн хувьцааны ханш сэргэх нь Хятадын зах зээлд эергээр нөлөөлөх боломжтой гэж үзэж байна. Гэхдээ Хятадын технологийн хувьцааны ханш тогтвортой өсөхийн тулд зөвхөн АНУ-ын зах зээл сэргэх нь хангалтгүй юм. Компаниуд хиймэл оюунд оруулсан хөрөнгө оруулалтаасаа ашиг олж эхлэх, ашигт ажиллагаагаа сайжруулах, мөн Хятадын дотоодын хэрэглээ нэмэгдэх нь зах зээлийн цаашдын сэргэлтэд чухал нөлөөтэй юм.